Dr Maszlee patut matak jaku iya pulai: Voon
Mandal Chairman Nasional Parti Keadilan Rakyat (PKR) Voon Shiak Ni minta Menteri Pelajar, Dr Maszlee Malik matak pulai jaku iya ti minta Sabah enggau Sarawak nyadi endur ngerembaika jalai pengarap Islam.
Lebuh dipadahka ke alai Maszlee semina mansutka penemu iya empu nyadi orang Islam, ku Voon, jaku nya enda berundingka sensitiviti orang ke ngelingi.
Voon madahka manah agi Maszlee matak pulai jaku nya enggau jampat sebedau penerang nya tau ngasuh charut enggau ngeruga pengelantang sereta pengelikun kelebih agi ngagai peranak Sarawak.
Enti penerang nya dipansut enggau enda sengaja, Maszlee patut matak iya tekala nya, ku Voon kemari.
“Kitai minta Menteri Pelajar, Dr Maszlee Malik nerangka penerang ti dipansutka iya ke ngelanggur penemu nempa Sarawak nyadi ‘Medan Dakwah’ lalu matak pulai penerang tekala nya.
“Aku minta Menteri Pelajar nerangka penerang iya ba Parlimen apin lama ke udah ti bekaul isu suntuk pengajar ngajar Islam ba Sarawak lalu iya udah ngansak Ustaz enggau Ustazah ari Kelantan enggau Terengganu dianjung baru gawa ba Sarawak bejalaika servis sida lalu nempa endur ngerembaika jalai pengarap,” ku Voon.
Voon mega madah, iya deka ngelalau Maszlee pasal penerang ke disebut iya nya enda entu manah ngagai peranak Sarawak lalu penerang nya ukai semina enda setipak enggau juluk ati majoriti peranak Sarawak ti ukai Islam tang mega enda setipak enggau Konstitusyen Perintah Besai enggau Sempekat Malaysia 1963 (MA63).
“Sekali agi aku nandu jaku ti sama ngagai Maszlee, mensia mayuh enggaika menteri ti semina nemu bejaku aja sereta patut berunding dulu sebedau mansutka jaku, laban jaku nya diterima rayat lalu meseti dikeingatka, budaya enggau pupu bansa ke bisi ba Sarawak,” ku Voon.
Dulu ari Voon, Gerempung Gerija Sarawak (ACS) mega udah mantaika peminta ti sebaka enggau iya.