Pengidup bansa Penan di Long Liwok berubah lantang pengudah bisi bekal karan 24 jam
LONG LIWOK, BARAM: Peranak Penan ba Long Liwok diatu udah ngasaika pengelantang pengudah bisi kuasa karan 24 jam nengah Skim Alternatif Kuasa Karan Menua Pesisir Sarawak tauka SARES.
Projek beungkus RM2 juta, nya siti inisiatif perintah nengeri nengah Opis Menteri Bekal Ai enggau Elekterik Menua Pesisir ti dipejalaika Sarawak Energy Berhad (SEB) nengah agih belanja perintah nengeri nyendiaka bekal kuasa karan 24 jam ngagai peranak ke diau ba menua pesisir.
Ketuai Komuniti Long Liwok, Pasan Wan, 54 lebuh dikerandau pengarang berita madahka sida udah lama nganti penatai kuasa karan, tang nadai kala nyangka utai nya ulih diadu laban pendiau sida kelalu jauh ba kampung.
“Kami nemu ukai mudah deka mai kuasa karan kitu laban pendiau kami ti chukup jauh ba puak kampung lalu enda ulih disambung kuasa karan ngena grid.”
“Kami berasai gaga ati laban perintah nengah SARES udah mujur nyendiaka karan 24 jam sereta ngubah pengidup kami,” ko Pasang lebuh dikerandau pengarang berita maya pengawa bejadika projek SARES ba Long Liwok,urung enam jam pejalai ngena kerita 4WD ari Miri, apin lama ti udah.
Pengawa nya dipenyadika ka Kaban Kunsil Nengeri (ADUN) Telang Usan, Dennis Ngau.
Projek nya udah tembu bulan Oktober taun 2017 sereta nguntungka rumah panjai ke diuan 130 iku raban bansa Penan, ke mungkur 35 pintu ruang bilik.
Pasang madah, sebedau bisi kuasa karan solar, sida melanja urung RM500 sebulan bebelika minyak dikena ngidupka injin api ti meri bekal kuasa karan.
“Tang enda semua ulih ngena injin api enggau lampu, bisi sekeda bilik ngena kelita enggau dian laban kurang penatai pemisi.”
“Tang SARES tu kami nya- mai laban nadai bebayar. Kami pan enda ibuh meli minyak enggau lampu. Kami ulih ngelimat duit lalu naruh ke belanja bukai,” ku Pasang.
Kelimpah ari nya, bala nembiak mit ulih nandu baru utai ti udah di pelajar sida di rumah, seraya sida ke indu nampung pengawa ngaga asil pengelandik jari nyengkaum beranyam.
Sida mega ulih naruh asil (pemakai) dalam peti ais mit sereta beperindang meda program televisyen enggau ngena perengka bukai baka kipas.
Martha Tinggang, 60, madahka sida indu ulih ngaga pengawa dikena nambahka penatai pemisi baka beranyamka tikai enggau ngaga beg ari wi.
“Dibanding enggau suba maya nadai karan, aku semina ulih beranyam maya siang hari, Diatu aku ulih beranyam siang enggau malam, asil utai anyam bisi nambah belipat. Baka suba nyentuk ke tiga ari nembuka siti beg digaga ari wi, diatu semalam pan ulih tembu,” ku Martha.
Martha madah pengudah bisi karan 24 jam, iya ulih ngaga sepenyampau 20 iti sebulan, semua asil anyam iya mayuh dijual di Miri.
ADUN Telang Usan, Dennis Ngau madahka SARES nya siti inisiatif perintah nengeri nyendiaka bekal kuasa karan 24 jam ngagai peranak ke diau ba endur ti kelalu jauh lalu enda ulih disambung kuasa karan ngena grid.
“Tagit kitai deka nyapai kuasa karan penuh ba taun 2021 iya nya ba semua 82 genturung pendiau di Telang Usan. Ke diatu urung 38 buah genturung udah bisi karan, sekeda benung disambung lalu bisi sekeda nya dalam perambu taun 2019.”
Dennis nambah, Long Liwok tu antara genturung pendiau ti tumu bulih projek SARES ba Telang Usan.
Iya madah, tu sebengkah chara perintah nulung sida bulih kuasa karan enggau lengkas.
“Enti nganti karan ari grid nya deka ngambi timpuh bepuluh taun, rayat di menua pesisir enda teantika nya. Nya kebuah, kitai deka ngena SARES ngambika mayuh ag rayat ulih idup lantang baka raban bansa ba mengeri.”
Iya mega ngansak Komit Pemansang enggau Pengelikun Genturung Pendiau (JKKK) sereta ketuai menua mantu nentuka sistem tu diintu komuniti sida enggau manah.