LHDN numbuha PKPS dalam timpuh sebulan udah teulihka RM3.2 juta
Berindik ari nya penyampau chukai di Sarawak ti udah digumpul bisi niki ngagai 1.5 peratus tauka niki ngagai RM70 juta
SIBU: Sepenyampau 83 iku orang ke mayar chukai udah ngambi bagi ba Program Khas Pengakuan Sukarela (PKPS) kenyau ti udah ditumbuhka dalam kandang sebulan enggau penyampau RM3.2 juta.
Ketuai Pemesai Eksekutif Opis Pengumpul Chukai Dalam Nengeri ( LHDN) Malaysia Dato Sabin Samitah madah, ari penyampau ngumpul chukai di Sarawak bisi niki ngagai 1.5 peratus taun tu dibida enggau taun siti tadi iya nya RM4.68 juta tauka nya niki ngagai RM70 juta.
“LHDN Sibu mega bisi ngerikod chukai nambah 2.28 peratus tauka nambah ngagai RM14.36 juta ti semua iya manggai RM643 juta naka bulan November tu.
“Kitai ngarapka penyampau tu majak nambah taun ti deka datai,” pia ku iya madah.
Iya mantaika pekara tu maya aum media rambai ke nemuai ngagai LHDN Sibu ditu, kemari.
Sabin madah, LHDN mega udah nganjung email enggau surat ngagai sida ke mayar chukai bekaul enggau PKPS.
“Kitai udah nentuka urung 80,000 iku mensia mayuh tauka kompeni ti tau mayar chukai baikka sida bisi madah tauka nadai.
“Sida tu udah dianjungka kitai surat. Penyampau tu mega bisi nyengkaum rayat nengeri Sarawak,” ku iya madah baru.
Ku iya, surat nya dikeluarka sida seririh enggau peminta
“
LHDN Sibu mega bisi ngerikod chukai nambah 2.28 peratus tauka nambah ngagai RM14.36 juta ti semua iya manggai
” RM643 juta naka bulan November tu.
Dato Sabin Samitah
Ketuai Pemesai Eksekutif LHDN Malaysia
Menteri Wang ti ngasuh LHDN mansik sereta audit sida ke bisi pengeraja ti mayuh tang enda madahka diri ngagai LHDN.
Berindik ari nya, iya ngarapka sida ti bekaul tu anang muai awak ngambi bagi ba PKPS ti dibantai perintah ba Bajet 2019 tu tadi.
PKPS ditumbuhka kena 3 November 2018 lalu deka tembu timpuh kena 30 Jun 2019 ti nyendiaka bayar ukum pemadu mimit iya nya 10 enggau 15 peratus enti dibida 80 peratus ngagai 300 peratsu sebedau tu.
PKPS tau digaga ba semua opis LHDN serata menua lalu penerang silik tau dipeda ba laman LHDNM nengah www. hasil.gov.my.
Penerang siilik mega tau ditanya nengah 1-800-88-5436 tauka 603-7713 666 (menua tasik) tauka emel: pengakuansukarela@hasil.gov.my.
Sama bela datai maya tu iya nya Direkter LHDN Sarawak Ramlot Keli, Direkter LHDN Sibu Dr John Tensay Peter Raig sereta bala bukai.