Raban bekuasa ti bekaul dipinta nyikap diri napi penusah ampuh bah di Tamin
Raban bekuasa bekaul diatu udah nyikap diri enggau sedia mantu enti bisi penusah bah mangka kandang menua Tamin.
Kaban Kunsil Nengeri (ADUN) Tamin Christopher Gira madahka tikas ai dalam kandang ai Batang Oya enggau Batang Mukah udah nyapai tikas bejaga pagi kemari, berindik ari ujan bangat beberapa hari ke udah.
“Aku bisi dipadahka Opis Residen enggau Opis Pelilih begulai enggau ejensi bekaul pasal sida bejaga lalu nyikap diri nganjung bantu ngagai sida ti tasah bah (enti bisi pematut).
“Aku mega bisi dipadah ke alai bilik operasyen ba Selangau udah dibuka dikena matau gaya bah,” ku iya lebuh dirandau kemari.
Gira madahka palan ngenduh enda lama dia ulih dibuka sebarang maya enti sema bisi peminta.
“Nya kebuah aku ngelalau peranak menua tu telefon nuju bilik operasyen enggau lengkas enti sida meda tikas ai ba kandang menua nya niki ngagai tikas ngeruga pengelikun.
Taja pia ku iya, naka diatu nadai sebarang palan ngenduh sereta mega nadai rumah panjai ba sitak Tamin udah ampuh bah.
Minggu nyin tadi, Residen Sibu Charles Siaw madah sepenyampau 52 iti palan ngenduh enda lama udah dikelala di bagi menua Sibu lalu tu ulih dibuka sebarang maya enti bisi peminta.
Ku iya, palan ngenduh ti bis ba Sibu (25), Selangau (10) enggau Kanowit (17).
Ba lansa bukai, diripot dalam bulan Febuari taun tu Selangau kena pangka bah ke alai 1,000 iku peranak udah dipindah ari rumah sida.
Ampuh besai mangka kandang menua ba Nanga Tajam Batang Mukah enggau Ulu Arip, lalu sekeda rumah panja ampuh sereta jalai tepekul.