Berengkah 2019 ‘Project Dog And Cat Neutering In Sibu Community’ udah ditetapka enggau rega baru

‘Project Dog And Cat Neutering In Sibu Community’ udah netapka rega baru meriri mayau enggau ukui berengkah Januari 2019.

Pengari komiti tu, Tony Wong madah, bayar tu dinikika urung RM10 enti dibida enggau rega lama lalu subsidi RM30 mengkang agi diberi dikena nyukung sida ke nganjung mayau enggau ukui ngagai sida.

“Bayar mayau indu iya nya RM90, mayau lelaki (RM70), ukui indu (RM110) enggau ukui lelaki (RM90),” pia ku iya maya aum media ditu, kemari.

Tony madah, semanjai taun tu projek komuniti sida udah meriri 105 iku mayau enggau ukui.

“Kitai ngatur pengawa meriri mayau enggau ukui berengkah bulan Januari lalu ditanduka bulan Mac, Mei, Julai, September, Oktober enggau Disember.

“Kitai beterima kasih ngagai mensia mayuh ti nganjung meriri mayau enggau ukui sida.

“Bisi mega pulai baru laban kami semina nerima mayau enggau ukai ti nadai orang nupi enggau iya ke purih menua tu empu.

“Tuju kitai meriri tu dikena ngembing mensia mayuh enda ngenyati jelu,” ku iya madah baru.

Tony madah, projek komuniti nya disaup bala bukai ti sama pengerindu enggau penyiru ngagai jelu di Sibu ditu.

“Projek renggat kedua belabuh 2019 diatur kitai nyentyk 2022.

“Projek tu tebuka ngagai mensia mayuh alai kelinik tu tau dilawa ba Central Veterinary Clinic,” pia ku iya madah.

Mensia mayuh ti deka begunaka servis sida tau betanya ngagai lumur 0168941326 dan Shaw Yu Tay di talian 016-8687671.