Kaban UPP meseti nyukung transformasyen ti digaga parti nya
Raban komuniti kelebih agi rebak nembiak enggau bala penyukung ti talukka Parti Rakyat Bersatu (UPP) patut nyukung tegut transformasyen parti ti nangkup peminta pengawa ngemaru seriris enggau peneras ubah politik kemaya hari.
Kaban Kunsil Nengeri (ADUN) Engkilili Dr Johnical Rayong Ngipa madahka ubah ngenyit dalam enggau luar parti patut dipejalai seriris enggau pengerembai politik kemaya hari menua tu ti begunaka sebuah parti ti kering, ngerembai, pupu bansa sereta tetangkupka peminta pengundi biak enggau enda ngelaungka pengundi enggau penyukung lama UPP.
“Nya kebuah, kitai ti nyadi bala ketuai besai nengah CWC, sayap Indu enggau Nembiak Besai netapka penemu mai pekara baru ke dalam parti tu dataika Parti Sarawak Bersatu (PSB) ditumbuh lalu ngubah lambang dikena nyilih UPP,” ku iya.
Iya mansutka jaku nya lebuh bejadika Program Pemesai Begulai Enggau Rayat ba Rumah Uring, Ensurai Abau, Batang Ai Ili kemari.
Dr Rayong ti mega Ketuai Nembiak UPP madah, pengudah nyauka lima taun endang ngasuh gagit ati maya UPP deka muka lambar baru.
“Kitai patut optimistik enggau merening ke mua ke alai pengada PSB ti dilanchar Kepala Menteri Datuk Patinggi Abang Johari Tun Openg kena 8 Disember tu tadi beserimbai enggau Aum Besai Diligit Ngenyit (EDC) nyadi lambar baru ngagai UPP,” ku iya seraya nambah, pengawa ti ditegika, semengat enggau juluk UPP ditampung ba sebuah kapal baru ti teguh agi, ulih besemekih sereta kering, iya nya PSB.
Berindik ari nya, Dr Rayong ngarapka Opis Pengerejister Gerempung (ROS) jampat ngemendarka rejista PSB ngambika bala ketuai enggau kaban ulih ngelangkar strategi entap nyura dunya politik menua tu.
Ngelansa silik, iya nyemetak madahka PSB nyukung tegut ketuai dipegai Abang Johari ngemudika Sarawak seriris enggau juluk, tuju enggau juluk iya ti seruran gawa negika semua hak Sarawak baka ti disempekat ba Sempekat Malaysia 1963 (MA63) sereta kuasa eksklusif ba minyak enggau gis.
“Aku minta semua raban kelebih agi penyukung ti talukka UPP sebedau tu meruan bediri teguh di belakang Presiden Dato Sri Wong Soon Koh enggau rintai ketuai parti ba pengawa ngenegapka PSB dikena ngangkatka iya nyadi sebuah parti ti ngasuh temegah, dipebasa bala bakih enggau bala bukai sereta gawaka nengeri enggau menua,” ku iya seraya nambah, PSB nerima semua bansa nyemilik iya.
Dulu ari nya, Dr Rayong udah bejadika rumah stor enggau atap baru Rumah Uring ti digaga apin lama ke udah nengah belanja Program Transformasyen Menua Pesisir (RTP) 2018.
Nambahka nya, iya ngemendarka pengawa meri geran Projek Mit Pemansang Menua Pesisir (MRP) ngagai Komiti Pemansang Enggau Pengelikun Genturung Pen- diau (JKKK) Rumah Uring penyampau RM5,000, seraya Biro Indu nerima RM3,000.
Sama datai bala pengari opis perintah, Penghulu Gerang Anchih, bala kaun- silor, tuai rumah sereta peranak diau ngelingi Batang A Ili, Skrang.