Polisi 90:10 dilanjar ngagai taun 2023
Opis Menteri Pelajar Malaysia (KPM) deka ngelanjarka Polisi 90:10 iya nya bekaul pemayuh pengajar asal Sarawak ngajar ba nengeri tu ngagai taun 2023.
Pekara nya dipadahka Opis Pelajar Nengeri Sarawak ( JPNS) nengah penerang berita, ensanus.
Nitihku penerang berita nya, timpuh ti ditagit nyapai polisi nya dipejalaika ari taun 2016 ngagai 2018.
“Ba taun 2019 penyulut Polisi 90: 10 udah nyapai 86.45 peratus pengajar asal ari Sarawak lalu 13.55 peratus asal ari nengeri bukai, ke ngajar di nengeri tu.
“Laban tagit tumu ulih dijapai, dia alai Opis Menteri Pelajar Malaysia ngelanjarka Polisi 90:10 ngagai taun 2023,” ku penerang nya.
Kelimpah ari nya, dalam penerang berita ti sama JPNS madahka SMK Song No.2, Song iya nya sekula baru, ngepunka sesi sekula Sarawak Taun 2019.
“SMK Song No. 2, Song iya nya sekula baru ti deka berengkah beoperasyen kena 2 Januari 2019 baka sekula bukai di Sarawak.
“Begunan sekula udah disuaka kena 21 Mac 2018 ngagai JPNS.
“Sepenyampau 222 iku nembiak nyengkaum Kelas Peralihan, Form 1 enggau Form 2. Begunan sekula tu disikap ngena 18 buah Bilik Kelas ti ulih muat endur 540 iku nembiak sereta bisi ker- eban bukai,’ ku JPNS nengah penerang berita.
Nambahka nya, penerang berita nya mega madahka Program Transformasyen Sekolah 2025 (TS25) deka chakah agi dikerembaika ba Sarawak.
Penyampau sekula TS25 berengkah ari taun 2016 ngagai 2018, iya nya 63 buah sekula ari semua PPD (nengeri tu) nyengkaum 10 buah sekula kohort 1; 10 buah sekula kohort 2; 43 buah sekula kohort 3 enggau semua sekula ba Malaysia deka ngambi bagi dalam program nya nyentuk taun 2025 senipak enggau juluk dalam Pelin Pemansang Pelajar Malaysia 2013 - 2025 (PPPM 2013-2025).
TS25 iya nya inisiatif dipejalaika KPM ari baruh Pro- gram Transformasyen Pelilih Menua (DTP) dikena nempa momentum transformasyen dalam pelajar dikena ngemansangka modal mensia abad ke-21 dikena nyapai PPPM 2013-2025).
“TS25 deka dikerembaika agi ngagai 64 buah sekula di nengeri Sarawak ungkup kohort 4.
“Tiga objektif besai dalam TS25 iya nya ngangkatka kompetensi ngatur enggau ngiring sekula sereta pemujur nembiak nengah chara holistik mungkur , runding,, intelek rama.
“Objektif ke ditetapka tu deka dikena dalam proses berati pengasi program ti dipejalaika endang tuju nya manah belama,” ku penerang nya.