JPNS komited mekal minyak ngagai sekula ti agi ngena injin api di menua pesisir
Opis Pelajar Nengeri Sarawak ( JPNS) komited nentuka sekula kelebih agi di menua pesisir ke ngena injin api, nadai agi betapi enggau penangggul bepetang.
JPNS nengah penerang berita ensanus madahka nya beduduk ari sekula ti ngena injin api dibekal minyak ti chukup nyentuk ujung bulan tu.
“JPNS komited nentuka nadai sekula ti deka bepetang laban isu kunterik ngintu injin api ngagai semua 356 buah sekula udah dibekalka PPD ngena minyak ti chukup sereta ulih dikena nyentuk ujung bulan Januari sebedau meli minyak ba taun 2019 dikemendarka.
“Berebak enggau tu JPNS mega chakah nentuka injin api ti udah jai diaduka sereta pengawa ngintu injin api dipejalaika awakka operasyen api lanchar,” ku JPNS nengah penerang berita.
Nambahka nya, dalam penerang berita ti sama JPNS madahka bisi 21 projek baru tauka ganti penuh ti dikemendarka di baruh projek RMK deka ditinda ti mungkur empat(4) buah sekula secondary enggau 17 buah sekula primary.
JPNS madahka ba taun 2019 penyampau semua sekula diperambu disambung grid bisi 152 buah sekula.
“JPN merambu bejalaika pengawa nyambung grid ungkup 133 buah sekula di serata Sarawak ngena agih belanja perintah nengeri enggau anggar ungkus siling RM50 juta. Projek deka dipejalaika ulih JKR/SESCO.
“Sepenyampau 20 buah sekula agi deka disambung ke grid ngena agih belanja Opis Menteri Pelajar Malaysia (KPM).
Kelimpah ari nya opis pelajar nengeri tu bisi juluk deka nyendiaka bekal ai beresi ngagai sekula ba Sarawak.
Pengawa nyendiaka bekal ai beresi nya deka dipejalaika ngena agih belanja ari perintah nengeri enggau besai.
“Bisi 132 buah sekula deka disambung bekal ai ngena siling RM9 juta lalu deka dipejalaika begulai enggau Opis Bekal Ai (JBALB) enggau Opis Pelajar.
“Dikena ngenyampatka agi bekal ai beresi disambung ba sekula, sepenyampau 69 buah sekula agi deka disambung ngena agih belanja KPM.
“Penyampau semua sekula ti diperambu disambung nya bisi 201 buah,” ku JPNS nengah penerang berita ke sama.