Chukai nyual 5 peratus produk petroleum nengeri tetap dipejalaika

Sarawak tetap deka neritka chukai nyual 5 peratus ba produk petroleum nengeri tajapan bisi bantah ari Menteri Pekara Wang.

Kepala Menteri Datuk Patinggi Abang Johari Tun Openg enggau nyemetak madah pekara nya hak Sarawak nengah konstitusyen.

“Iya (Menteri Pekara Wang) madah pekara nya deka nambah ungkus alai pemeranak puku engka enggai beranakka puku ba pengawa minyak enggau gis di Malaysia, ketegal chukai nyual.

“Saut aku ngagai iya, kitai bisi hak neritka chukai nyual nengah konstitusyen,’ ku iya.

Abang Johari mansutka jaku nya ba aum pengarang berita di Komplek Kunsil Nengeri (DUN) di Petra Jaya ditu, kemari.

Ngenang kaul ke sama, Abang Johari madah perintah besai ulih ngurangka chukai ari penatai petroleum enti deka tegap besemekih ba industri minyak enggau gis.

Perintah besai ku iya ulih ngubah struktur chukai enti deka tegap besemekih ala diatu chukai ari penatai petroleum ba ikas 38 peratus.

“Enti deka tegap besemekih nadai kebuah kitai ngalahka diri ketegal nya sigi hak Sarawak. Komiti mega setuju kitai neritka chukai nyual 5 peratus.

“Sida (perintah besai) tau ngurangka 5 peratus ari penyampau chukai ngagai 33 peratus aja,’ku iya nambah.

Ditanya sekalika perintah besai setujuka chukai nya Abang Johari madah sida semina diau diri.