Enam projek infrastruktur beungkus RM37 juta deka digaga ba DUN Tamin
Kaban Kunsil Nengeri (ADUN) Tamin Ir Christopher Gira Sambang madah, enam projek infrastruktur rayat penyampau RM37 juta deka berengkah digaga ba sitak Kunsil Nengeri (DUN) nya dalam taun tu.
Gira madah, projek-projek nya mungkur pengawa ngemanahka Jalai Pasai Siong beungkus RM17 juta, pengawa ngaga Kompleks Lumba Mini Selangau (RM8 juta), Selangau Waterfront (RM5 juta), enggau Begunan Opis Pelilih (RM5 juta) sereta ngemanah baru Jalai Kemena Sungai Bawang (RM2juta).
Kenu ku iya, projek ngemanah Jalai Pasai Siong, Jalai Kemena Sungai Bawang enggau ngaga opis pelilih baru Selangau udah tembu ditinder lalu deka berengkah digaga pun taun tu, lalu pengawa ngaga kompleks Lumba Mini Selangau enggau Water Front Selangau ditaga be[un tengan taun tu.
“Pengawa ngaga Dewan Serbaguna SK Tong Ah, Selangau enggau ungkus RM500,000 ti dikemendar perintah nengeri taun siti ke udah diatu benung digaga.
“Aku meri terima kasih ngagai perintah nengeri laban udah ngemendarka projek nya dikena ngangkatka mayuh agi pengawa pemansang di Selangau,” ku iya maya dirandau.
Gira mega meri terima kasih ngagai perintah besai ke dulu suba laban udah ngemendarka pengawa ngaga Balai Bomba enggau Penyah Penusah Selangau ke beungkus RM5 juta lalu diatu benung digaga.
Kelimpah nya, iya mega meri terima kasih ngagai exADUN Tamin Datuk Joseph Mauh Ikeh laban udah mer tanah pemesai tiga ekar semak pasar Selangau dikena ngaga Dewan Serbaguna Serakup Bansa Dayak Sarawak (SDNU) Selangau.
“Agih belanja nya udah diagih nengah bajet Program Transformasi Luar Bandar (RTP) dikena nyungkur taba dewan ke diatu ba proses tender.
Ku iya mega, projek ngaga dewan nya dipelaba berengkah taun tu tauka abis laun 2020.