Kimpin anang nginsap ba palan tebuka patut dipejalai
Opis Menteri Pengerai dipinta sama nyaup bejalaika kimpin tu dikena ngemuntangka pengawa pedagang palan pemakai
“
Ungkup sitak dipegai aku, mayuh entara palan dagang pemakai udah nemu bekaul atur tu, semina ari perati aku kemari, pedagang palan pemakai nya madahka diri agi sanggu madah ngagai klien sida ngambika ngetu nginsap di
” kedai kupi sida.
MIRI: Raban pedagang palan pemakai di kandang menua pesisir endang ngadang atur enda tau nginsap ti digaga ba renggat nasional deka dikena di Sarawak tang bala pedagang ngarapka bantu ari raban Opis Menteri Pengerai ngambika keterubah tu ngatur program meri penyedar ngagai mensia mayuh ba renggat baruh.
Mayuh ari bala pedagang tu agi irau deka madah tauka nangkan bala klien sida ngambika ngetu nginsap di palan dagang pemakai ketegal ti irauka atur tu deka ngeruga pejalai pengawa dagang sida tang nyema nengah kimpin pelajar ti bekaul pekara tu ulih ngubah runding sereta ulah sida ti nginsap ba renggat baruh.
Baka ke dipeda kitai, bala orang ti datai ke palan pemakai di kandang menua pesisir di selampur nengeri tu bisi ti endang udah teleba enggau sida ti beempu palan pemakai nya enti dibanding enggau pedagang di kandang mengeri ke ngembuan tagit kilen ti besai sereta mayuh.
Kaban Parlimen ( MP) Sibuti Lukanisman Awang Sauni ke endang nyukung perambu bejalaika atur ti digaga perintah tu, lalu ukai semina nyukung puang aja tang iya mega ngelekatka papan tanda ‘No Smokng’ ba palan servis parlimen kelai nyukung penuh polisi pengerai mensia mayuh ti digaga tu.
Iya pechaya mayuh bala pedagang dalam sitak nya udah nemu bekaul pekara tu sekalika di berita ari televisyen, media chelak sereta media rama tang agi mega ngarapka pemesai ari Opis Menteri Pengerai sama bela nyaup sida bejalaika polisi tu beoun ari renggat baruh.
“Ungkup sitak dipegai aku, mayuh entara palan dagang pemakai udah nemu bekaul atur tu, semina ari perati aku kemari, pedagang palan pemakai nya madahka diri agi sanggu madah ngagai klien sida ngambika ngetu nginsap di kedai kupi sida,” ku iya madah ngagai The Borneo Post.
Bala pedagang deka enggau naka ulih nitihka atur nya lalu ngandalka mega pemesai penerit adat ari opis menteri bekaul matau kediri lalu meri kimpin penyedar ngagai mensia mayuh ba kandang menua ti dipegai sida.
MP Sibuti nya madah, iya endang nyukung penuh atur enda ngasuh nginsap di palan mensia mayuh ngambika sida ke enda nginsap nya nadai napi pemedis berindik ari sida ke disebut ‘second hand cigarette smoke’.
“Aku mega nyukung pemutus bekaul enda tau nginsap di luar palan dagang pemakai ke nyadi pengawa dikena nyeliahka empas ke negatif ngagai pengerai mensia mayuh di Sarawak enggau Malaysia ke lalu mega ulih ngemanah kualiti angin,” ku iya nandu.
Iya meransang bala orang ti nginsap ngambika nitihka atur baru tu lalu ngarapka sida ulih ngurangka pengawa nginsap.
Lukanisman setuju enggau atur ti ngaga palan endur nginsap tiga meter ari palan dagang pemakai lalu pia mega palan ti enda tau nginsap nya ulih nyadi palan ti digazet ungkup inisiatif Opis Menteri Pengerai.
Mayuh menua baka Australia, Singapore nyengkaum mega Thailand udah ngambi singkang ti sebaka dikena nyeliahka peranak menua nya napi pemedis ‘second- ary smoke’ enggau bejalaika atur ti terit bekaul nginsap di palan mensia mayuh.
Lukanisman enda setujuka isu ti madahka nengah bejalaika atur ke enda ngasuh orang nginsap di palan mensia mayuh ulih meri empas ke enda manah sentang dagang pemakai laban mayuh mega apai indai ti milih enda ke restauren ti ulih ngasuh anak sida napi asap insap.
“Sida rindu agi milih restauran ti enda ulih nginsap lalu tu nyadi peluang ti besi ngagai sida pedagang narit mayuh agi klien makai di palan dagang sida,” ku iya nyemetak.
Iya andal deka meda Opis Menteri Pengerai enggau kaunsil kandang menua di Sarawak ngengkahka tanda ‘No Smoking’ laban tu endang siti pekara ti meseti dipejalai di semua palan dagang pemakai ti tebuka sereta mega restauran di nengeri tu.
“Kededua raban ti bekaul meseti bisi konsep sentang palan ti endang disediaka un- gkup sida ti nginsap enda jauh ari palan dagang pemaka ti tebuka sereta bejalaika kimpin penyedar paling enda dalam timpuh enam bulan dikena ngiri penemu ngaga mensia mayuh bekaul pekara enda tau nginsap di palan mensia mayuh,” ku iya.
Lukanisman meri jaku tu bekaul ripot ti madahka Opis Menteri Pengerai deka ngena chara nengah ngir penemu lalu meri penerang ti holistik dalam enam bulan keterubah bejalaika atur enda tau nginsap di palan dagang pemakai tebuka lalu patut ngukum sida ti nginsap ke enda nitihka atur tu.
Tu ari jaku Menteri Datuk Seri Dr Dzulkefly Ahmad ti madahka atur tu iya nya ‘ Standard Operating Procedure’ ( SOP) ti norma dikena ngiri penemu ngaga mensia mayuh sebedau ukum dipejalai.
Beserimbai enggau nya MP Sibuti nya minta perintah ngambi neritka atur ti nyua insap ngagai bala nembiak sekula.
Lukanisman Awang Sauni MP Sibuti