Atur ngurangka pengawa nginang manuk, itit di belakang rumah teulihka pemujur
Atur ngurangka pengawa nginang manuk enggau itit dalam kandang genturung pendiau di Sibu Jaya tetemuka pemujur, pia ku chairman Opis Kaunsil Menua Pesisir Sibu Sempurai Petrus Ngelai kemari ti madahka bisi sekeda pengempu rumah nya nadai penanggul mindahka sangkar manuk itit ari belakang rumah sida.
“Bisi timbal ke positif ba pengawa ti dipejalaika kami.
“Taja pia kami enda ngetu nyentuk ke juluk nya dijapai,” ku iya madah ngagai The Borneo Post.
Ku Sempurai, pengawa nginang manuk dalam kandang genturung pendiau nya enda dikemendar laban ke enda beresi sereta tau ngeruga pengerai mensia mayuh.
Kaqunsil nemu pengawa nginang manuk nya ukai semina dipejalaika di belakang rumah aja tang mega ba mua rumah.
“Kita tau berundingka baka ni orang bukai ke diau dia ensium bau tai manuk sereta mega mayuh lalat ba kandang endur nya.
“Anang nginang manuk semadi mih bisi pemendar arti kaunsil ketegal bisi batang tuju,” ku iya ngelalau.
Kaunsil ngemendarka mensia mayuh nginang enda lebih ari lima iku manuk tauka itit sementara aja, kelebih agi ngagai bala indai ke deka beranak enggau sebedau ngatur sebarang pengerami.
“Taja pia, sida patut nulis surat minta pemendar ari kaunsil nengah Seksyen Pengerai Mensia Mayuh,” ku Sempurai.
Berebak enggau nya, iya ngelalau mensia mayuh ke diau dia ngaga ripot sebana rasmi ngagai kaunsil nyema bisi tetemuka orang ti diau berimbai bisi nupu manuk itit ti nadai pemendar.