Empat buah rumah di Melatai udah angus tengah malam kemari
Penusah angus ti nyadi dinihari Hari Empat (3 Januari) udah nganguska empat buah rumah dua ringkat ti diuwan 17 iku peranak di Melatai, Jalai Selirik ditu.
Raban Bomba udah nerima telefon urung pukul 12.35 tengah malam ti madahka bekaul penusah angus nya nyadi.
Pemesai Bomba Kapit Errwandy Tugor udah nguluka 12 iku raban bomba ke bukai beguai ngagai endur penusah nyadi ngambika enda ngerekai ngagai rumah bukai. Raban bomba udah datai ke endur penusah nyadi urung pukul 12.48 tengah malam, lalu pengawa sida ngetuka api ti nganguska rumah tu urung 3.35 pagi.
Empat buah rumah ti udah dituntung penusah angus tu digaga setengah konkrit lalu setengah agi papan ti pemesai 30x120 kaki.
Dua buah rumah keterubah diripotka udah angus lengis, lalu rumah ti ketiga urung 80 peratus angus enggau rumah ti keempat 70 peratus angus. Penusah tu udah ngujungka peranak ari empat buah ruang bilik nya lenyau semua reta ti dikemisi sida diempa api.
Entara ti udah angus iya nya entukar, sebuah mutosikal, perengka elekterik baka ‘airconditioner’, peti ais enggau injin basu lalu semua dokumen ti beguna mega udah angus diempa api.
Lebuh penusah nya nyadi, bisi 17 iku peranak ti ngembuan rumah nya benung tinduk.
Kena pagi Hari Empat Errwandy enggau dua iku pemesai iya udah nikal ke endur penusah nyadi laban deka nasat pun penusah nya lalu sida pechaya nya bepun ari karan ti bisi penanggul.
Sama bisi datai ngabas penusah nya Pemesai Pelilih Kapit Abdul Malik Hashim, Pemesai Administrasyen Opis Pelilih Kapit Wan Shukri ke mega nyadi ketuai dalam pemansang rama, raban Komiti Pengelikun Periman (APN), staf ari Opis Pengintu Pengelantang Rama Kapit ti betuaika Jemat Kanchin.
Kelimpah ari nya, Kaban Kunsil Nengeri ( ADUN) Bukit Goram Jefferson Jamit Unyat ke benung di Kuching laban bisi pekara rasmi udah minta Sapit Chairman PBB Pampang Kapit Watson Awan sereta Cochan Amos ti ngarika Palan Servis PBB Kapit udah bela datai ngabas sida ti udah dituntung penusah angus tu. Jamit deka datai ngabas sida kena Hari Enam tu sepengudah pulaika Kapit.
Ba kenang ke bukai mega Penghulu Sia Shui Poh enggau Chairman SUPP Kapit Ling Thian Ing enggau sekeda kaban komiti mega sama bis datai ngabas penusah nya.