Staff PPD Sarikei diperansang negapka pengelandik diri
Penyulut ba pelajar patut meri fokus ngagai intensif modal mensia, mungkur semua pekara enggau ngemeratka penemu dalam jeman pemadah sereta digital kemaya hari.
Pemesai Pelajar Pelilih (PPD) Sarikei, Lau Ngie Tung madah seriris enggau gaya pekara nya, genap iku pengajar enggau bala staf PPD patut ngenegapka pengelandik, penau enggau pengeransing ti tinggi maya bejalaika pangku pengawa sekalika ba sekula tauka ba PPD.
“Gaya pekara tu mega begunaka semua pengajar enggau PPD nyikap diri enggau bemacham penemu ngambika ulih nyingkang ke mua, regas enggau tegap seriris enggau juluk nyadi pengajar enggau staf perintah ti meruan sereta ngemai pangka tinggi ba opis diarika sida.
“Pangku pengawa enggau tanggungpengawa bala pengajar diatu majak besai, mar enggau mayuh macham, berindik ari kerembai enggau pekara baru ba dunya pelajar.
“Diatu pengajar ukai semina ngenataika penemu enggau pengelandik aja tang mega bejalaika pangku pengawa nyadi peransang enggau ngemuntangka atur pengawa ngiri penemu enggau pengelandik ngagai bala nembiak,” ku iya.
Lau mansutka jaku nya rambau Pengerami Sekalung Budi Sejambak Kasih enggau Apreasiasi PPD Sarikei, apin lama.
Pengerami udah diatur ba Balai Sekula Sekondari (SMK) St. Anthony Sarikei.
Kenu ku Lau, pekara dijapai enggau juluk opis pelajar begunaka pengeran gawa enggau tanggungpengawa tinggi ba semua renggat.
Seriris enggau pekara nya ku iya, pemujur opis pelajar tebal agi bepanggai ba pemanah servis ti dipejalaika bala pengajar.
“Nya kebuah kitai patut nambahka agi pengelandik enggau penemu sereta deka ngelimpangka jam diri gawa ngemanahka nama profesion staf opis pelajar.
“Nyadi orang ti gawa perintah, taluk enggau lurus ngesan tanggungpengawa ti udah dilempai, kitai enda tau kelalu lantang ba tikas dijapai aja.
“Kitai patut sedia lalu ngembuan runding ulih nerima ubah seriris enggau ubah sereta peminta ngelingi ti seruran berubah,” ku Lau madah nyemetak.
Berebak enggau pengerami nya, sepenyampau 16 iku pengajar ti gawa ba Pelilih Sarikei ti pinchin taun tu udah dirami.
Pengerami tu diatur dikena ngenang jasa enggau pengawa bala pengajar sepemanjai timpuh sida gawa.
Beserimbai enggau pengerami nya mega, pengawa nyuaka Anugerah Nyulut ngagai sekula ba pelilih Sarikei ti udah teulihka penyulut sekalika ba bidang akademik, kokurikulum enggau mega lumba.
Sama datai Chairman Kaunsil Pelilih Sarikei ( MDS) Wong Zee Yeng ti ngarika Kaban Kunsil Nenger (ADUN) Repok, Dato Sr Huang Tiong Sii, ex-PPD Sarikei, Radin Foji Radin Abdul Rahim, Prinsipal SMK St Anthony ti nyadi Chairman Pengatur Pengerami, Vincent Liong Shou Chuan enggau Chairman Kaunsil Kepala Pengajar Pelilih Sarikei, Kho Tai Chai.