Pemutus perintah nurunka rega minyak nerima timbal ti positif
Pemutus perintah besai ti netapka rega renchit produk petroleum ninting minggu sereta nurunka rega nya nerima timbal ti positif nyengkaum ari raban orang ti nyendiaka servis Grab.
Pemutus penetap rega renchit enggau rega minyak ti nurun berengkah 5 ngagai 11 Januari meri pengaga enggau pengelantang ati ngagai mensia mayuh tauka penguna.
Jackshua Renggan Geraman, 28, siku ari orang ke nyendiaka servis Grab madahka berita bekaul enggau rega minyak nya endang berita manah.
Iya madahka pemutus nya meri pengeransing ati ngagai iya ke nyendiaka servis Grab ba mengeri tu.
Berebak enggau tu iya ngingatka mensia mayuh ngambika enda kelalu gagit ati meda rega produk petroleum nya bisi nurun tang patut landik ngatur belanja diri.
Kebuah pia ku iya, chara ke dipejalaika bekaul enggau rega minyak nitihka atur apungan sereta rega renchit produk petroleum nya berubah ninting minggu.
“Ba aku tu endang berita manah lebih agi dikena kitai ngepunka taun baru 2019.
“Ngarapka kitai semua mesti ransing agi ngiga belanja tambah baka kami ke deriba Grab, awakka pengidup kitai meruan likun beduduk ari penatai pemisi ruang bilik ti tegap.
“Taja pia aku arapka mensia mayuh enda kelalu gagit bekaul enggau penurun rega minyak tu laban nya semina ungkup timpuh seminggu tu, ukai setaun, sereta ngena atur apungan,” ku iya ti asal ari Rumah Panjai Sungai Langit, Betong madah ngagai Utusan Borneo, kemari.
Nambahka nya, Joanester Gaing, 31, mega muji pemanah atur perintah besai taja pan chara netapka rega enggau atur apungan kala dipejalaika sebedau tu.
Iya arap bendar perintah amat ulih ngambi bagi ba pengawa ngurangka pemerat tauka pemar pengidup ti ditapi rayat.
“Chukup manah atur perintah baka tu, taja pan tu mekanisma lama kala dipejalaika perintah ke dulu suba (Barisan Nasional).
“Kitai ngarapka rega minyak enda bangat mar laban kitai ke nyadi penguna endang ngandalka perintah berunding muka jalai ba sebarang pemar ti ditapi rayat,” ku ti mega siku ari orang ti nyendiaka servis Grab ti asal ari menua Kapit.
Kelimpah ari nya Chang Chai Soon, 44, peranak Kampung Melaban Kota Samarahan mega madahka diri gaga ati laban nya keterubah perintah besai dibaruh Pakatan Harapan bejalaika pengawa nurunka rega produk petroleum.
“Berasai gaga ati laban tu keterubah perintah besai Pakatan harapan nurunka rega minyak.
“Arapka rega minyak baka ke diatu nya ulih terus dijaga perintah awakka enda bangat nating pengidup lebih agi baka kami ke deriba tauka nyendiaka servis Grab ke endang begunaka minyak ninting hari,” ku iya.
Polycarp Danson, 43, lebuh ditanya isu ke sama iya madahka, bepelasarka rega produk petroleum tauka minyak ke diatu ngena atur apungan, perintah udah bejalaika pekara ti betul dikena nentuka rega dibayar penguna senipak enggau market diatu.
“Siti agi pengelebih mekanisme tu iya nya penguna ulih ngasaika rega minyak ba tikas ti tetap, abis nadai ungkup dalam timpuh beberapa bulan.
“Ari nya, ulih ngurangka pemerat ke diasaika penguna bekaul rega minyak, kelimpah ari bisi jalai dikena betapi enggau inflasi. Lalu udah nya deka nentuka rega renchit produk petroleum bepanggai ngagai rega minyak mata dunya, ti deka meri fleksibiliti ngagai penguna lebih agi ke diau ba menua pesisir ngasaika rega minyak ti lebih murah bepelasarka penurun rega minyak semasa,” ku iya.
Lebuh ke ngenang pasal rega produk petroleum tauka minyak ke ulih niki enggau nurun, Polycarp bepenemu rega nya endang meri empas besai ngagai rega barang, servis enggau kos idup.
Ku iya, enti rega minyak niki dia rega barang bukai berengkah niki lalu ulih ngeruga pengidup ninting hari rayat lebih agi barang ke diguna tiap hari.
“Tang nama ti ngenyinu iya nya lebuh rega minyak nurun, sida ke bejual tauka bedagang nadai bebendar deka nurunka rega barang.
“Nama ke dikearapka aku iya nya ngarapka orang ke bedagang enda nikika rega barang ti ke lalu nating penguna, lalu lebuh rega minyak nurun sida perenchit enggau orang dagang mega enda patut sepeneka ati nikika rega barang,” ku iya.
Datuk Patinggi Abang Johari Tun Openg Kepala Menteri Sarawak
Kededua projek nya dulu agi ari tu udah dikinsil Perintah Besai ke baru Pakatan Harapan (PH), tang Perintah Nengeri diatu deka neruska projek nguna belanja nengeri.
“Proses ngeluarka tinda kededua projek jematan nya deka dibuka ngagai kuntrektor nitihka polisi baru Perintah Nengeri.
“Perintah nengeri nengah Gabungan Parti Sarawak (GPS) enda ngetuka program pemansang.
“Enti PH enggai ngaga, Perintah Nengeri agi ulih ngemujur kededua projek,” ku iya.
Iya mansutka jaku nya rambau bejadi Fiesta Samariang ke diatur di Pengkalan Panjang Simpang 4, Kampung Lintang di Petra Jaya ditu, kemari.
Abang Johari nambah, GPS nyadi siti gempung ti deka ngembing Sarawak nyapai pemansang alai semua pe- mansang ke ditusun di nengeri tu sigi ungkup pemaik rayat.
“Kitai ningkilka diri ari Barisan Nasional (BN) lalu numbuhka gempung ti diarika parti asal nengeri tu iya nya GPS.
“Nengah GPS kitai ulih nentuka kuing diri lalu ngembing Sarawak nyapai pemansang,” ku Abang Johari.
Iya mega madah Perintah Nengeri deka majakka kerejasama enggau Perintah Besai PH.
Ku iya, kerejasama nya deka nentuka semua program ke ditusun entara kededua perintah ulih dikemujur enggau manah.
“Asal aja program nya ungkup pemaik rayat nenger tu, kitai sigi seruran mer kerejasama,” ku iya.
Bela datai Menteri Muda ba Opis Kepala Menteri Sharifah Hasidah, Kaban Parlimen ( MP) Petra Jaya Dato Sr Fadillah Yusuf, Datuk Bandar Kuching Utara Datuk Abang Abdul Wahap Abang Jula enggau orang bukai.