Atur netapka rega renchit produk petroleum tetap disukung PEPPS
Gerempung Ejen Produk Petroleum Sarawak ( PEPPS) bepenemu atur netapka rega renchit produk petroleum ninting minggu deka meri empas tauka penanggul ngagai raban orang dagang.
Taja pia Presiden iya Edwin Banta madahka sida iya (PEPPS) nyukung mekanisma rega renchit petroleum ke dipejalaika perintah ke diatu, taja pan nya bisi mai pemanah enggau pengelemi.
Iya bepenemu rega produk petroleum ti nurun niki nya nadai tentu penanggul, sereta untung tauka rugi mega enda balat nanggul semina timpuh netapka rega nya ulih meri penusah.
“Diatu orang dagang semina minta pengawa netapka rega nya anang kelalu bejarit baka seminggu sekali laban pedis ngatur.
“Enti ulih pengawa netapka rega renchit produk petroleum tu diatur baka kelia tauka ditukar sebulan sekali.
“Kedua, isu kami iya nya dikena ngurangka pengerugi maya rega betukar iya nya nengah chara ngurangka stok tiga hari ngagai maksimum dua hari stok. Ngarapka ulih dikemendarka,” ku iya madah ngagai Utusan Borneo, kemari.
Edwin mansutka pekara nya lebuh dipinta meri penerang bekaul enggau penurun rega renchit petroleum dalam timpuh 5 ngagai 11 Januari, pengawa netapka rega enggau chara ‘pengapungan’ ke dipejalaika perintah.
Nengah penerang berita Opis Menteri Wang ensanus, pengawa madahka rega renchit deka dipejalaika Hari Lima (Jumaat) ninting minggu lalu diteritka berengkah Hari Enam (Sabtu) nyentuk Har Lima(Jumaat).
Berengkah 5 ngagai 11 Januari 2019, rega renchit petrol RON97 deka diturunka ari RM2.50 seliter ngagai RM2.23 seliter; RON95 diturunka ari RM2.20 seliter ngagai RM1.93 seliter lalu rega renchit diesel deka diturunka ari RM2.18 seliter ngaga RM2.04 seliter.
Lebuh ke ngenang pasa pengawa netapka rega produk petroleum ninting minggu nitihka atur ‘apungan’ bepelasarka formula Mekanisme Rega Automatik (APM), Edwin bepenemu chara nya baka ke dipejalaika di menua tasik enda ulih dikemeranka laban stesyen minya nya ulih nyua ngena sepeneka rega.
Ari nya ku iya stisin ke nyual ngena sepeneka rega ulih munuh tauka ngeruga stisin bukai ke enda tentu beduit tauka kos operasi tinggi, ke ngujungka nadai bulih penguntung.
“Stisin minya ke nada jenama tauka enda ngena SOP tau bulih untung laban ulih nyual ngena rega murah.
“Nya meh empas negative ngagai chara ‘apungan’,” ku iya.