Sarawak setuju ngemansang projek Agropolitan di Lingga

Sarawak setuju ngemansang industri pemakai nengah projek Agropolitan di Lingga, Sri Aman.

Kepala Menteri Datuk Patinggi Abang Johari Tun Openg madah pengeran nya nangkup pinta Perintah Besai ti dekaka Sarawak mantu ngemansang industri pemakai di menua tu.

Berindik enggau nya ku iya, Perintah Nengeri mutus nyen- dia tanah pemesai 2,000 ekar di Lingga, Sri Aman ungkup projek nya.

“Tu mih asil pemereti sereta kerejasama entara perintah nengeri enggau perintah besai ti keran ngemansang industri pemakai lalu meri pemaik ngagai rayat,” ku iya.

Iya mansutka jaku nya rambau bejadi Fiesta Samariang di Kampung Lintang di Petra Jaya ditu, kemari.

Abang Johari nambah, tanggungpengawa ngemujur projek nya udah diberi ngagai Sapit Kepala Menteri ke mega Menteri Betanam Betupi Moden, Tanah Adat enggau Kandang Menua Datuk Amar Douglas Uggah.

Pekara nya ku iya seraris enggau pengeran perintah nengeri ti meratka pemansang industri pemakai ditu.

“Perintah Nengeri nengah Gabungan Parti Sarawak sereta Perintah Besai nengah Pakatan Harapan ngembuan pemereti enggau ulih ngadu kerejasama ungkup pemaik rayat.

“Perintah Besai nengah Tun Daim Zainuddin (Chairman Komiti Penyanding Penemu Perintah) bisi nulis surat ngagai aku sentang pinta ngemansang industri pemakai alai aku nyanggup pinta nya,” ku iya.