FTMRTT 2018 Long Bedian mujur ngayanka penyelai ti dikembuan etnik Orang Ulu
Festival Tanda enggau Muzik Asal Rayat Tanah Tinggi (FTMRTT) 2018 edisyen ke-4 di Long Bedian ti diatur kena 14 enggau 15 Disember taun siti nyin tadi udah dipejalai enggau rami ti narit lebih 600 iku temuai datai ngemataka penyelai ti dikembuan etnik ba kandang endur nya.
Lebih 10 tim tanda main asal udah mantaika tanda asal sida dalam pengerami nya ti diatur Opis Pelilih Telang Usan enggau Opis Pelilih Mit Long Bedian sereta saup ari Komiti Pemansang enggau Pengelikun Genturung Pendiau (JKKK) Long Bedian.
Tu nyengkaum mantaika tanda asal ari etnik Kelabit, Kayan enggau Penan. Lalu sama bisi merindang maya nya penanyi ti bebansa Penan, Jolly Jengan ke udah begulai enggau temuai ti datai semanjai dua malam panggau tanda enggau muzik asal nya sekali tu.
Kelimpah ari nya, bisi mega berapa buah seruyuk nyual pemakai enggau asil pengelandik jari udah disediaka semanjai pengerami nya lalu ejensi perintah mega sama bisi datai ngulu pengerami nya.
Bejaku ba pengerami nya, Kaban Kunsil Nengeri (ADUN) Telang usan Dennis Ngau ti nyadi pengari Kaban Parlimen (MP) Baram Anyi Ngau madah, taja semua etnik sekali tu enda ulih nganjung tim betanda, tang penyereta sida di atas panggau endang manah nyentukka bisi sekeda program dikinsil laban jam enda chukup.
“Tu iya nya ti keempat kali pengawa ngatur pengerami lalu nitihka sambut ti dipeda tu endang chukup manah, kitai nengah Opis Menteri Dagang Temuai, Seni eng- gau Main Asal deka ngatur pengerami ti sebaka ba taun ti deka datai (2019) lalu tu ila nyangka deka ngaul ejensi perintah baka Kaunsil Dagang Temuai Sarawak (STB) enggau Pustaka Negeri,” ku iya.
Dennis mega ngenataika pengaga ati ngagai komiti pengatur ti betuaika chairman nya Jok Eng Jok ba pengeransing iya enggau semua peranak Long Bedian nyengkaum staf Opis Pelilih Mit Long Bedian dikena nentuka program nya mujur.
Sama bisi datai ba pengerami nya Sekretari Politik Kepala Menteri Charles Balan Seling, Tuai Kampung Lah Anyi, Chairman Pengatur Jok Eng Jok, Kunsilor Jok Ngau pemesai ejensi perintah sereta bala bukai.