Lo asa meda ulah sekeda orang muai uras sengapa
Tugung uras ke dibuai sengapa ba laman Kedai Besai Lee Ling di Matang semak supermakit Emart Matang ditu balat dipeda kamah.
Deka nemu, sapa bagi ti nugungka uras ba palan mayuh mensia baka nya, palan ke usah dipansa lebih agi sida ke diau besemak enggau kedai besai nya?
Asil tinjau Utusan Borneo kemari beratika bisi sebuah tong uras besai disedia ba palan nya, tang nadi dikena mensia mayuh.
Chaimrna Kaunsil Mengeri Padawan (MPP) Lo Khere Chiang lebuh dirandau kemari madah, iya chukup asa enggau ulah sekeda orang ti enda mereti muai uras sengapa baka nya.
MPP ku iya, udah naka ulih ngajar mensia mayuh ngubah runding ngambi sayauka rampa menua lalu nyaga pemeresi pasar.
Tang ku Lo, taja mayuh pengawa udah digaga diumba enggau jaku tangkan ari piak MPP, tang penanggul muai uras ba sebarang endur agi tubah nyadi.
“Ketegal ulah mensia ti muai uras sengapa baka nya, MPP nanggung ungkus meresi uras belipat pemayuh,” ku iya.
Tandu Lo, MPP begulai enggau Trienekens Sarawak, udah bekerejasama lima taun pengelama enggau piak sekula awak ngajar bala anak pasal penusah ke ulih nyadi ketegal plastik ngagai rampa menua sereta pemaik pengawa ngena baru plastik ke udah dikena awak ulih nyaga rampa menua.
Bala anak mit ku iya, endang nyadi duta pemadu manah dalam bejalaika pengawa badas tu mai apai indai sereta nusi berita manah madahka pemaik nyaga rampa menua.
“Aku ngarap nengah ulah lebih ngemeranka pengawa anang muai uras sengapa tau nyadi tenggau awakka enda muai uras ba palan mayuh dipansa mensia.
“Berebak enggau nya, kitai mega minta mensia mayuh nyadi mata enggau pending MPP ngeripot ulah orang ke muai uras sengapa enti agi bisi meda ulah baka nya uda tu.
“Kerejasama semua piak amat dikena mantu piak bekuasa pelilih menua (PBT) bukai nagang ulah orang muai uras sengapa,” ku iya.