Semua kaban PRS dipinta terus ngetan, nyukung ketuai parti
Ngambika parti tu ulih bekerejasama enggau parti bukai dalam GPS lalu ulih negika hak Sarawak ari perintah besai
MIRI: Semua kaban Parti Rayat Sarawak (PRS) diansak ngambika terus ngetan sereta seruran kering nyukung ketuai parti.
Mandal Presiden PRS Majang Renggi madah, tu dikena nentuka parti ulih bekerejasama enggau parti bukai dalam Gabungan Parti Sarawak (GPS) ba pengawa negika hak nengeri ari perintah besai.
Majang madah, PRS nemu bisi jaku selebubu ngapa suah enggau diatu pan benung dikejaku rayat di nengeri tu lalu mega di renggat baruh bekaul imej Sarawak.
Berindik ari nya, iya ke mega Kaban Kunsil Nengeri (ADUN) Samalaju madahka, nyadi sebuah parti ti megai tanggungpengawa dalam negika nasit rayat di nengeri tu, kaban PRS diminta ngaga enggau abis manah dalam mai penerang enggau berita ti betul nengah media ke bisi.
“Entara isu ti benung angat enggau dampih ba ati rayat iya nya bekaul enggau pengawa nyukat sereta ngenukuka Tanah Adat Hak Bansa Asal (NCR). Beserimbai enggau nya perintah nengeri nge- mendar ubah ba Akta Tanah Bumiputera ke dikearap ulih mutarka isu bekaul tanah.
“Taja pan perintah besai enda nyediaka agih belanja khas ungkup pengawa nyukat tanah NCR ba taun 2019, perintah GPS deka tetap neruska pengawa nyukat nengah agih belanja sepenyampau RM40 juta ari perintah nengeri,” ku iya bejaku ba pengerami makai lemai beserimbai enggau Taun Baru 2019 ke diatur PRS Pampang Senadin di sebuah hotel ditu, malam kilah ensana.
Kelimpah ari nya, isu bekaul hak Sarawak baka ti udah dipadah dalam Sempekat Malaysia 1963 (MA63) deka terus ditegi lalu nyadi pekara ti pemadu dikemerat taun tu.
Ku Majang nambah, presiden PRS ke mega Sapit Kepala Menteri Tan Sri Datuk Amar Dr James Jemut Masing iya nya entara rayat Sarawak ke paling ransing dalam ngetanka hak Sarawak kenyau ari maya pekara tu mula dipejurai suba.
“Enggau sukung ti kuat lalu nadai ati dua ari semua rayat enda ngira etnik, jalai penga-
“
Entara isu ti benung angat enggau dampih ba ati rayat iya nya bekaul enggau pengawa nyukat sereta ngenukuka Tanah Adat Hak Bansa Asal (NCR). Beserimbai enggau nya perintah nengeri ngemendar ubah ba Akta Tanah Bumiputera ke
” dikearap ulih mutarka isu bekaul tanah.
Majang Renggi ADUN Samalaju
rap enggau penemu politik, kitai pechaya hak ti udah lenyau nya deka dipulaika ngagai kitai baka ti dipadahka dalam MA63.
PRS iya nya parti ti ditumbuhka peranak Sarawak ti ada ari peneleba ke mayuh ngajar kitai pasal pematut ngembuan penyerakup ngagai batang tuju pejalai parti dalam pengawa negi sereta ngetanka hak enggau pemerat rayat Sarawak.
Berindik ari nya, ku iya nambah, PRS patut seruran ngembuan runding ti tebuka enggau dinamik dikena ngaul diri enggau gaya politik ke bisi diatu sekalika di reng- gat nengeri tauka menua lalu enda ngelengkaka nama pan agenda ti ditan, ideologi enggau prinsip.
Sama bisi datai Ketuai Unit Indu PRS ke mega Sekretari Politik Kepala Menteri Dato Seri Doris Sophia Brodie, Kaban Majlis Tetinggi PRS ke mega chairman pengatur pengerami makai lemai Kunsilor Misiah Abdullah, ADUN Murum Kennedy Chuk Pai, ADUN Tamin Christopher Gira Sambang, Mandal Chairman PRS Pampang Senadin Kunsilor Rantai Achin sereta kaban parti ari Senadin, Pujut, Lambir enggau Bekenu.