Lagu Iban bisi peluang ti manah ngerembai ke tikas ti tinggi agi
Lagu Iban ngembuan peluang ti besai ngerembai ke tikas ti tinggi agi nyema leka lagu ti ditulis nya bepelasarka main asal enggau jalai pengidup raban bansa tu, kelimpah lagu nya ti nitihka tempo kemaya hari ti narit ati agi.
Sekretari Gerempung Anak Seni Iban Sarawak (PASIMA) Isa Lee madah munyi nya laban iya pechaya pengawa ngangkatmanah muzik Iban, iya nya enggau nyusun lagu sereta isi lagu ti ngena konsep ke dampih ba ati rayat menua tu.
“Isi lagu ti bekaul enggau menua tu ko aku iya nya nyengkaum leka lagu ti ngembuan ulah ke manah nengah standard Jaku Iban, main asal, adat ke nyadi elemen ti pemadu berat ke ngayanka jalai pengidup sebenar bansa Iban.
“Ambika chunto lagu ‘Anak Kampung’ ke disada Jimmy Palikat ti datai ari Sabah ti endang kuat sereta ngembuan identiti ti manah ke ngayanka jalai pengidup ti amai nyadi sereta imej ke endang betul baka komuniti Sabah.
“Kelimpah ari ngembuan tiun muzik enggau leka lagu ti ‘catchy’, lagu ‘Anak Kampung’ mega ngemasukka elemen muzik etnik sereta main asal bansa iya.
“Di Sarawak, lagu ‘Bekikis Bulu Betis’ ke disada Andrewson Ngalai iya nya entara chunto ti pemadu manah,” ku iya ke mega siku ari penanyi sereta komposer muzik lagu Iban.
Isa ke mega popular enggau lagu ‘Tubai Pengerindu’ madahka peminta sereta minat orang ti ninga lagu Iban diatu udah berubah.
Iya mega muji sekeda artis Iban diatu ke berani mai tiun, leka lagu, tusun muzik sereta teknik rekoding ke nyelai ari ti sebedau tu.
Nyema suba, muzik, tusun, ‘chording’, tema sereta instru- mental lebih ngagai gitar tauka bunyi ‘string’ ari keyboard aja, ku iya nambah.
“Diatu, muzik, tusun, ‘chording’, tema enggau instrumental nya ukai semina mekuh ngagai gitar tauka bunyi ‘string’ ari keyboard aja. Aku muji sekeda ari komposer enggau pengeluar album sereta penanyi ti berani enchuba lagu ngena konsep baru.
“Raban nembiak diatu mega belajarka teknik belagu nen- gah chara ‘on-line’ baka ar ‘YouTube’,” ku iya nandu.
Iya ngarap ngambika industri muzik etnik di Sarawak makin ngerembai lalu ulih meri mayuh peluang gawa sereta pun penatai pemisi ngagai penanyi enggau pemuzik.
Beserimbai enggau nya, iya minta kerejasama semua raban ti bekaul di nengeri tu ngambika segulai sejalai nentuka muzik enggau lagu Iban ulih digaga manah agi.