Mayuh ejensi perintah di Mukah udah sedia napi penusah ampuh bah
Mayuh ejensi perintah seruran besedia napi sebarang penusah ti deka nyadi maya musim pengujan ti nyadi di kandang menua Mukah.
Kaban Kunsil Nengeri ( ADUN) Balingian Abdul Yakub Arbi madahka tu nyengkaum pengawa nyikap diri nyema bisi penusah ngenyit ampuh bah ti nyadi ba kandang menua nya.
“Mayuh ejensi udah besedia napi sebarang penusah ampuh bah ti nyadi,” ku iya madah ngagai Utusan Borneo.
Entara ejensi ti udah besedia tu iya nya Opis Residen, Opis Pelilih, Opis Pengintu Pengelantang Pendiau, Raban Pengelikun Periman Malaysia, Polis sereta Opis Bomba enggau Penyelamat.
Ejensi bukai ke sama udah besedia iya nya Opis Entali Ai, Opis Kereja Raya, Opis Volunteer Malaysia (RELA) sereta raban penerit adat menua.
“Ukai semina nya, raban Ketuai Komuniti enggau Ketuai Kaum mega sama ditangkan ngambika seruran besedia,” ku iya nambah.
Dalam napi penusah ti kritikal ke nyangka deka nyadi, Bilik Operasyen Pengatur Penusah Ampuh Bah ba Opis Residen, Opis Pelilih sereta Opis Pelilih Mit deka dibuka.
Beserimbai enggau tu, tangkn ngagai raban ti berikan, sida patut seruran nitihka jaku tangkan ti dipansutka raban penerit adat.
Tu kelebih agi bekaul lalau bekaul angin kuat sereta gelumbang besai.
Sida mega patut seruran nitihka perambu gaya hari ke bisi dipadah.