SRDC minta kerejasama semua raban nyaga perengka guna mensia mayuh
Opis Kaunsil Menua Pesisir Sibu (SRDC) enda lantang ati enggau ulah ngenyati perengka guna mensia mayuh kelebih agi baka tung uras ti majak nyadi kemaya hari tu.
Ketegal pekara nya Chairman SRDC Sempurai Petrus Ngelai madah, iya ngarapka mensia mayuh meri kerejasama ngagai piak sida ba tuju ngurangka agi ulah nya.
“Minta mensia mayuh anang sanggu ngeripot ngagai SRDC nyema tetemuka orang ngereja penyalah baka tu.
“Ulah ngenyati tauka nunu tung uras ngena- taika penanggul ngagai orang bukai.
“Diatu mayuh tung uras ti disediaka kitai ditunu, dikenyati kelimpah bisi nya nadai temu penunga agi,” pia ku iya madah.
Iya madah, tung uras tu ukai diempu siku aja tang bela dikena semua lalu patut sama bela ngintu.
Bekaul enggau pengawa nupi itit enggau manuk ba ujung bilik di genturung pendiau, ku iya, pekara nya diatu udah bisi kurang.
Ku iya, bisi orang enda ngibuh ke tangkan ari opis sida tang diatu udah mayuh meri kerejasama nyengkaum ngererak langkau jelu tupi sida ngambika enda ditunggu.
“Tu ari pengeransing kitai ngelama tu. Taja pia kitai mengkang deka nandu pengawa ke sebaka,” ku iya madah baru.
Sempurai madahka pengawa nupi manuk enggau itit ba ujung bilik di genturung pendiau enda manah lalu tau ngeruga pengerai mensia mayuh.
Ari pansik sida ngelama tu bisi orang ngereja pengawa baka nya sebedau tu.
“Bakani asai ke besemak ti nyium bau enda manah ari jelu tupi tu?,” pia ku iya.
Berindik ari nya, iya minta mensia mayuh tau ngeripot ngagai sida nyema bisi tetemuka penyalah baka nya.
“SRDC enda kakang bejalaika atur ti bekaul enggau pengerai sereta pengelikun,” ku iya madah baru.