Penatai ukui lelang ngirauka ati komuniti Islam di Pasar Muara Tuang
Penatai ukui lelang ba genturung pendiau ke majoriti diuan komuniti Islam di Pasar Muara Tuang ditu ngenusah ati peranak ditu berebak enggau penyakit Rabies ke agi bisi nyadi ba nengeri tu.
Tinjau Utusan Borneo di Kampung Tanjung Bundong, Fasa Satu tetemuka ukui lelang agi mayuh bekedayau ba kandang genturung pendiau nya.
Tambah mega, ukui lelang nya dipeda bejalai beraban nyerungkai tong uras ba mua rumah peranak genturung pendiau nya.
Kenu ku siku peranak dia beumur 53 taun ke enggai disebut nama, penatai ukui lelang ba genturung pendiau ditu lebih agi ba
Lorong 2B3 dipeda kenyau taun nyin kemari.
“Makin hari majak mayuh ukui lelang bekedayau ba genturung pendiau tu.
“Tu ukai semina ngeruga pengelikun peranak genturung pendiau lebih agi anak mit tang ngujungka kandang ditu balat kamah laban tong uras ke diengkah ba mua rumah nyau kena serungkai ukui,” ku iya maya dirandau kemari.
Tandu iya, penatai ukui lelang tu mega ngeruga pengelantang peranak genturung pendiau lebih agi maya malam hari.
“Nyau deka ninting malam ukui tu nyalak lalu tu chukup ngachau pengelantang maya kami tinduk, lebih agi sida ke bisi beranak mit tentu tedani,” ku iya.
Siku agi peranak menua nya, 32 taun mega diau ba Lorong 2B3 genturung pendiau nya, ukui lelang nya ukai semina ngachau pengelantang enggau ngeruga pengelikun mensia mayuh taung mega dikenang mai penyakit Rabies.
“Kitai bela nemu Sarawak agi kena penyakit tu laki kita enggai ketegal penatai ukui tu ngujungka penanggul nyadi.
“Nya alai, kitai ngarapka piak kaunsil kandang menua (PBT) enggau pengerai berunding chara ke patut mutar penanggul ukui lelang ditu,” ku iya.
Nangkan nya, Chairman Kaunsil Mengeri Kota Samarahan (MPKS) Dato Peter Minos maya dirandau madah piak sida deka neritka atur bekaul enggau kompelin sentang pekara nya “Aku udah ngasuh staf MPKS meresa sereta ngaga atur ke patut. Kita sigi beguna amat ke timbal enggau penerang ari mensia mayuh lebih ag peranak ke dijaga MPKS,” ku iya.