Jematan semak SK Nanga Ensiring runtuh ketegal tanah tekerap

Jalai ngelawa Sekula Primari (SK) Nanga Ensiring semak ditu putus pengudah jematan lumpung batang runtuh ba jalai batang kenyau ari beberapa hari ke udah.

Jematan lumpung batang nya urung 2.15 kilometer penyauh ari sekula udah runtuh ketegal struktur repuk enggau tanah tusur nyadi ketegal ujan bangat kandang beberapa hari ke udah.

Penanggul nyadi begulai enggau tanah tekerap ba sepanjai jalai ke sama, urung 500 meter penyauh ari sekula.

Kelimpah ari bala nembiak enggau pengajar SK Nanga Ensiring, peranak ari enam buah rumah panjai dia bepanggai ba jalai tu nyadi jalai pengangkut sida.

Nitih ku penerang, jalai tu mega ditengah bala ari sekula primari bukai, SK Nanga Ju enggau Kem Batang Semujau.

Ba lansa bukai, lebuh dipadah pasal penusah nyadi ari peranak menua nya, Kaban Parlimen (MP) Julau, Larry Sng Wei Shien , tekala nya ngemai pekara tu ngagai perati Opis Menteri Pemansang Menua Pesisir (KKLB).

Ku Sng, Iya udah dipadahka Menteri KKLB, Rina Mohd Harun, ke alai jematai baru nyilih jematan ke runtuh nya deka digaga pengudah tinda projek dibuka ngambika ditinda berebak enggau nya, iya udah madahka Rina pasal jematan bukai ba Rantau Bandau ti mega begunaka perati jampat.

Taja pia, seraya nganti pengawa ngaga jematan KKLB nya dipejalai, iya deka minta kerejasama ari Opis Kereja Raya (JKR) enggau operator kem nyeleti dulu jematan batang nyadika pemutar enda lama ngagai penanggul nya, ku Sng nambah.