Rayat di nengeri tu dikearap meri sukung ke tegap ngagai GPS

Semua rayat nengeri tu nyengkaum peranak menua pesisir patut meri sukung tegap ngagai Gabungan Parti Sarawak (GPS).

Penghulu Andrewson Ngalai madahka rayat Bumi Kenyalang mega patut meri sukung nadai bebagi ngagai Chairman GPS ti mega Kepala Menteri, Datuk Patinggi Abang Johari Tun Openg ba pengawa nentuka tunga kuing nengeri tu.

“Nyadi rayat Sarawak, aku minta semua peranak Sarawak bediri tegap begulai enggau GPS laban semina parti ba gempung tu deka gawa negika hak sereta peminta rayat ba nengeri tu,” ku iya.

Ku Ngalai, GPS ti datai ari parti komponen asal ari Sarawak, deka seruran gawa negika hak Sarawak ti deka nyamin pengelantang semua rayat ba Bumi Kenyalang.

GPS ku iya, mega nyadi pelasar beguna endur ngempung rayat pupu bansa ba nengeri tu.

“GPS bisi kuing baru gawa negika hak enggau peminta rayat pupu bansa enggau pengarap, begulai nyapai pemansang.

“Tu beguna amat ngambika kitai ulih ngetanka hak enggau pemerat Sarawak ti udah disempekat ba Sempekat Malaysia 1963 (MA63), seriris enggau konstitusyen nengeri enggau menua,” ku Ngalai nerang.

GPS deka dilanchar kena 19 Januari tu pengudah pengawa mandangka logo enggau lagu GPS ari Abang Johari ba indu opis Parti Pesaka Bumiputera Bersatu (PBB), Hari Tiga tu tadi.

Kelimpah PBB, parti komponen bukai dalam GPS iya nya Parti Rakyat Sarawak (PRS), Parti Demokratik Progresif (PDP) enggau Parti Sa’Ati Rayat Sarawak (SUPP).