Peranak Kpg Sungai Endot Lot ngarapka penanggul ai ditapi sida diputar lengkas

Peranak Kampung Sungai Endot Lot balat sebana napi penanggul bekal ai ti lalu enda teputar.

Ketuai Kampung Sungai Endot Lot, Mohammad Man madahka penanggul tu nyadi lebih ari setaun, berengkah ari Disember 2017 nyentuk pun taun tu.

“Penanggul tu baka ke nadai nemu abis lalu balat nating peranak.

“Taja raban Opis Bekal Ai Menua Pesisir (JBALB) bisi bejalaika bemacham pengawa ngurangka tating penusah ditapi peranak baka nyadung ai ngena lori, tang tu apin chukup.

“Diatu peranak ngarapka pengawa lengkas dikejalai ngemanahka baru bekal ai beresi ngagai genturung pendiau ti diuan lebih kurang 700 iku,” ku iya lebuh dikerandau media, kemari.

Penanggul tu majak nyadi kenyau ari raban bekaul ngemanahka sambung paip dalam bulan Disember 2017 suba, bekal ai ba genturung pendiau nya tejanggal nyentuk diatu.

Kenu ku siku agi peranak, Haji Olen Tabur, terubah suba, sida semina napi penanggul ai enda deras muakka siang hari aja.

“Muak ke malam, peranak deka nerima bekal ai, tang kenyau ari beberapa bulan ke udah, penanggul majak nating lebuh bekal ai nadai diterima.

“Nasit amat diatu musim pengujan lalu tu meri awak ngagai peranak betimbunka ai, tang naka ni penanggul tu deka nyadi.

“Tebal agi peranak ngarapka raban bekaul ulih ngiga jalai mutarka penanggul tu enggau jampat laban balat amat nating peranak sereta ngachau pengidup sida besesehari,” ku iya.

Ku Haji Olen nambah pengelama penanggul tu nyadi, raban JBALB udah nganjung bekal ai ngena lori sehari sekali, tang penyampau ai ti dianjung mimit amat.

“Bekal ai ti diagih enda chukup lalu peranak anda amat bekal ai deka seruan ditambah dikena ngelempungka tating penusah peranak,” ku Haji Oleh madah nyemetak.