Woksyop bejuraika tusun pengawa nagang pengelekai penyakit rabies berengkah 16 Jan
Woksyop pengelama tiga hari bejuraika tusun pengawa ke tau nagang pengelekai penyakit rabies deka diatur di Kuching berengkah 16 Januari tu.
Sapit Kepala Menteri Datuk Amar Douglas Uggah madah woksyop deka ngaga pansik ba strategi ke dikena diatu ngambi ulih nempa chara baru ngelaban keruga penyakit nya ti berengkah ngelekai ba bulan Julai 2017.
Wokshop nya ku iya deka digulu raban pemesai ari mayuh bengkah ejensi ke bekait enggau tanggungpengawa nya.
“Kitai meseti ngetuka pengelekai sakit rabies tu ti udah malut 60 kandang menua diserata nengeri kelimpah Pelilih Limbang.
“Sakit ti udah nabanka nyawa tu mengkang bisi pengudah berengkah ditemu kena 1 Julai 2017 di Kampung Paoh Ribuh, Serian.
“Empat hari udah nya, Serian dikelai nyadi pelilih keterubah napi penusah sakit rabies,’ku iya rambau nyadi chairman aum komiti nengeri sentang penyakit rabies ditu, kemari.
Uggah nambah, nyentuk ngagai diatu penyakit nya udah nabanka 15 nyawa alai siku mengkang diperubat.
Iya mega madah bisi 20,000 kes ketup ukui dirikod di serata nengeri.
“Program nuchuk ukui enggau vaksin ke diadu kitai enda nerima timbal ke manah ari orang bempu ukui alai kitai mengkang ngelalau sida mai ukui betuchuk ba program ke bisi diatur,’ku iya.
Ba sentang penyampau 225,000 iku ukui di serata nengeri, Uggah madah 109,216 udah dituchuk enggau vaksin rabies.
Tagit kitai ba taun tu iya nya nyapai 70 peratus ari penyampau ukui diberi tuchuk, tandu Uggah.
Iya netapka program betuchuk nya deka dipajak seag nengeri tu mengkang dibalut virus rabies.
Ba sentang 928 chunto uku ke udah dianjung ngambi tau diperesa, Uggah madah 323 iku ditemu positif rabies.
Iya ke nyadi Chairman Komiti Mutar Penusah Ngenyit Nengeri madah 14,030 iku ukui ke nadai orang ngempu udah ditangkap.
Woksyop nya ila deka digulu raban pemesai ar Ejensi Mutar Penusah Ngenyit Menua( NADMA) Polis, Soldadu, RELA Opis Penyendia Servis Veteriner( JPS) ari Sabah enggau Putrajaya.
Bela datai ngulu aum Menteri Opis Kunsil enggau Pengawa Berumah Datuk Dr Sim Kui Huan.