ATA Ke-23 pelasar ngelakuka industri dagang temuai Sarawak
Sarawak nyukung penuh program tikas dunya diatur di nengeri tu ke nyadi sebagi ari inisiatif transformasyen digital
KUCHING: Sarawak nyukung pengawa ngatur Anugerah Televisyen Asia (ATA) Ke23 ti keterubah nya diatur di nengeri tu.
Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah madah pengawa nya ulih ngelaku industri dagang temuai Sarawak ti ngembuan potensyel ke besai.
Ku iya, industri dagang temuai disengkaum ba inisiatif transformasyen digital ari buah runding Kepala Menteri Datuk Patinggi Abang Johari Tun Abang Openg.
“Pengerichah pengawa tu mandangka Sarawak ulih ngatur pengerami enggau manah ungkup raban pemerindang tikas dunya di serata Asia.
“Nambahka nya, ATA ke diatur ditu seraris enggau pengawa ngelanchar Kimpin Nemuai ke Sarawak 2019,” ku iya ba pengerami Makai Lemai Gala ATA Ke-23 di Palan Aum Borneo Kuching (BCCK) ditu, malam ensanus.
Iya nambah, Kimpin Nemuai ke Sarawak (VSY) 2019 nyadi siti chara Perintah Nengeri ngerembaika ekonomi sereta ngembing industri dagang temuai nuju ubah digital.
“Ungkup kitai di Sarawak, kitai ngembuan pengarap enggau pelin ti manah ngambi ulih matak mayuh agi peranak ari menua luar datai.
” Naka bulan November taun ke udah, kitai nerima 4.3 juta penatai orang dagang temuai ari serata dunya alai penyampau tu ulih ditambah nengah pelin tauka atur ke manah.
“Siti chara iya nya nengah pengerami ATA, ke alai tu nyadi chara kitai mandangka Sarawak ngagai mata dunya,” ku iya.
Ngenang kaul ke sama, Abdul Karim meransang orang ke ba industri nya ditu ngerembai identiti sereta ngempuru cherita ke bekaul enggau Asia
“
Pengerichah pengawa tu mandangka Sarawak ulih ngatur pengerami enggau manah ungkup raban pemerindang tikas
” dunya di serata Asia.
Datuk Abdul Karim Rahman Hamzah
Menteri Dagang Temuai, Seni, Main Asal, Nembiak enggau Lumba
Tenggara.
“Nengah chara tu, aku ngasai ATA deka seruran relevan nyadi pelasar ke chukup manah endur kitai nempa orang baru ba industri tu di Asia,” ku iya.
Ba pengerami malam nya, 28 pemenang ari 42 kategori anugerah ke dipekit bisi dibantai lalu pemenang dipilih 50 iku raban juri ke pemadu manah ari menua Asia.
Lebih 50 selebriti ari menua Asia datai ngulu pengerami baka ke Cheng Rexen, Maneerat Kum-Uan, Hu Gua, Ah Xiang, Louis Scott sereta sekeda ke bukai.
Bela datai Chairman ATA Lee Keen Whye, Sekretari Mendam Opis Menteri,Hii Chang Kee, Direktor Program, Koh Jik Seng enggau orang bukai.