Pemanah rampa mengeri Kuching narit ati raban penyereta ATA Ke-23
Raban penyereta Anugerah Televisyen Asia (ATA) Ke-23 disadang enda jera datai kitu laban beratika pemanah rampa mengeri tu chukup engkeman endur ngerembaika industri kreatif nyengkaum filem.
Ketuai Pemesai Eksekutif (CEO) Global Kreatif Media Agency Adam Ham madah mengeri tu endang siti ari palan ke chukup manah ditapatka raban pengemeran industri kreatif di menua tu enggau ari menua luar.
“Kebuah pia laban penyelai ke bisi ditu baka pemayuh adat enggau main asal tentu nadai ulih dipeda ba menua bukai.
“Nya alai aku ngasaika pengawa ngatur ATA Ke-23 di Kuching endang pilih ke betul diumba enggau mayuh raban pesereta serak tu enda kala datai ke Sarawak, Malaysia,” ku iya.
Adam mansutka jaku puji nya rambau program media begulai enggau CEO ATA Ke-23 ke diatur ba sebuah hotel tebilang ditu, kemari.
“Kitai bela nemu, ungkus ngatur pengerami anugerah filem chukup besai enti ba mengeri besai baka di Singapura, tang aku ngarap nya enda nekul raban pengemeran industri tu ari rantau Asia milih Kuching tauka endur bukai di Sarawak nyadi palan ngemujurka pengawa sida.
“Arapka timpuh ke enda lama dua hari tu, ulih dikena bala pesereta beratika enggau silik pemanah enggau penyelai ke bisi ba kandang mengeri tu,” ku iya.
Nangkan nya, siku pemesai ke mega akim pekit ATA Ke-23, Dr Punchi Nilame Meegaswatte ari Sri Lanka madah, tu mega keterubah iya datai ke mengeri tu lalu ngasaika diri chukup betuah laban ulih nyingkang ke kaki ngagai siti menua ke manah baka Kuching.
“Enggau lurus ati aku madah, mengeri Kuching chukup manah lalu engkeman alai ngaga filem kreatif.
“Penatai mensia ari mayuh bengkah endur ti bisi dipeda ba mengeri tu diperati chukup nyelai nyata ngayanka pengelantang enggau pengelikun Sarawak” ku iya seraya madah tu mih peluang kitai ngelakuka siti mengeri ke baka Kuching ngagai serata dunya.
Bela datai ngulu aum pemberita tu CEO ATA Ke-23 ari menua Filipina, Thailand, Vietnam, Taiwan enggau Korea Selatan.