JPNS deka chakah agi ngatur PIBKS di sekula

Sapit Direktor Opis Pelajar Nengeri Sarawak (JPNS) Abang Mat Ali Abang Masagus madah Program Kaul Apai Indai, Komuniti enggau Peribit (PIBKS) di sekula deka chakah agi diatur.

Ku iya, program nya dikearap ulih nempa raban nembiak ti ngembuan ulah ke manah sereta ulih napi dunya pelajar ti majak mar.

“PIBKS tu deka diatur chara karnival ke alai kitai keran ngadu ubah ba pekara pelajar.

“Program mega ulih ngangkatka sistem pelajar kitai ngagai ikas ke sama enggau sistem pelajar di menua luar ti udah dulu mansang ke mua,” ku iya.

Abang Mat mansutka pekara nya ba jaku pengelalu program Kaul Apai Indai enggau Komuniti di SMK Datuk Patinggi Haji Abdul Gapor ditu, kemari.

Program dipenyadi Menteri Pelajar, Sains enggau Pansik Teknologi ( MESTR) Dato Sri Michael Manyin.

Nengah program nya ku iya nambah, sekula ulih ngemeranka runding tebuka lalu nerima penatai enggau pemeri tauka pengelandik bala apai indai, komuniti enggau ari sektor pribit.

“Program mega ngangkatka pemereti sereta matak kaul apai indai, komuniti enggau ari sektor pribit ba pengawa sekula.

“Bala apai indai deka nyadi kaling stratejik sekula lalu ulih nyaup ngangkatka kualiti sekula.

“Dikearap nengah program tu, sekula ulih nempa pemujur ba sukut pelajar, disiplin enggau kokurikulum,” ku iya.

Iya nambah program seraris enggau Pelin Pemansang Pelajar Malaysia (PPPM) 2013-2025, Anjakan ke Semilan ti netapka apai indai, komuniti enggau sektor pribit meseti dikerembai sereta ditegapka tanggungpengawa.

Ku iya, ubah ba pekara pelajar ba dunya maya ke diatu begunaka kaul apai indai, nagih komitmen komuniti sereta ari sektor pribit mantu sekula enggau regas agi.