JPNS merambu netapka numbur telefon apai indai patut diberi ke pengajar
Opis Pelajar Nengeri Sarawak ( JPNS) merambu ngeluarka penetap iya nya bala apai indai meri numbur telefon sida ngagai pengajar.
Menteri Pelajar, Sains enggau Pansik Teknologi (MESTR) Dato Sri Michael Manyin madah pekara nya deka ngemudah komunikasyen entara pengajar enggau apai indai.
Beambika chunto menua Finland ke mansang ba pekara pelajar, Manyin madah atur nya nyaup ngintu disiplin nembiak di sekula
“Kami baru pulai ari Finland, alai menua nya mansang ari sukut pelajar.
“Tetiap iku pengajar di Finland bisi numbur telefon bala apai indai nembiak lalu ketegal nya sida ulih ngadu komunikasyen enggau manah.
“Ketegal nya mega penanggul disiplin bala nembiak di sekula menua nya nyauka ba ikas kusung, semina 0.07 peratus aja,” ku iya.
Manyin mansutka jaku nya rambau bejadi program Kaul Apai Indai enggau Komuniti di Sekula Sekondari (SMK) Datuk Patinggi Haji Abdul Gapor ditu, kemari.
Iya nambah, JPNS ngaga pemutus deka matak bala apai indai ngaul diri ba pengawa di sekula.
Iya pechaya apai indai nyadi raban ke ulih mantu sereta meri input ke tau ngangkatka ikas pemujur sekula baikka nya ba sukut pelajar, ulah enggau pesonaliti nembiak.
“Ba tetiap sekula sigi bisi napi pemar, tang pengudah apai indai ngaul diri ba pengawa sekula, disiplin ba sekula ulih dikurang.
“Ketegal bisi 3 pekara ti nentuka pemujur tetiap sekula iya nya pengajar, nembiak enggau apai indai,” ku Manyin.
Manyin nambah, kitai ditu suah meri tanggungpengawa nya ngagai pengajar, tang ke amat bala apai indai ke mayuh nentu pemujur bala nembiak ketegal sida begulai enggau anak sida.
Bela datai Sekretari Mendam MESTR Datu William Patrick Nyigur, Prinsipal SMK Datuk Patinggi Haji Abdul Gapor, Affandi Rosli enggau Yang Dipertua PIBG S. Paramanathan.