Urung 50 peratus ukui udah dituchuk Vaksin selampur nengeri

Program nuchuk vaksin rabies ba selampur nengeri udah nyapai 50 peratus, iya nya dianggar lebih ari 100,000 iku ukui udah dituchuk.

Direktor Opis Servis Verterinar Sarawak (JPVS) Dr. Adrian Ambud Susin madahka raban sida mega nganjung tim ari tetiap bagi menua ba nengeri tu bejalaika program nya.

Ku iya madah nyemetak, tu dikena nyapai tagit 70 peratus sitak kuru rabies datai ba ujung taun tu.

“JPVS enti ulih deka nagit, 100 peratus kandang menua kuru rabies tang kitai fukus dulu nyapai 70 peratus sebedau ujung taun.

“Penyampau ukui ba selampur Sarawak diatu dianggar nyapai 220,000 tang tu dipelaba deka nambah baka ti ditemu kitai jelu tu mega beranak baru,” ku iya lebuh dipinta ngelansa Program Vaksinasi Rabies ti diatur ba Balai Mayuh Guna Malihah ditu, kemari.

Berebak enggau nya, program ‘Annual Spot Vaccination’ mega udah dipejalai di Lundu ari pengawa nganjung tim sida kenyau ari 2 Disember 2018 nyentuk 10 Januari tu tadi.

Tu mungkur 10 ngagai 20km kandang menua ba garis entara menua Kalimantan-Sarawak ngaul 44 buah genturung pendiau enggau 954 iku ukui udah dituchuk vaksin.

Udah tu deka diatur ba genturung pendiau ba sitak Padawan ti ngaul 52 buah genturung pendiau ti deka berengkah pun bulan Febuari tu.

Iya mega ngelalau, ukui ti beumur 3 bulan enggau tuai agi enda tau enda dituchuk vaksin nya.

Jelu inang baka mayau, raban sida minta pengempu jelu nya datai ngulihka sanding penemu enggau tuchuk rabis ari klinik jelu peribit besemak.

“Rabies tu igi penyakit ti serius lalu patut dipunas enggau jampat,” ku iya.

Kemari sepenyampau 105 iku ukui udah dituchuk vaksin rabies, ari penyampau nya, 65 dituchuk dos keterubah seraya 40 iku agi tuchuk dos kedua ba Taman Malihah ditu.

Penulung Pemesai Veterinar Kanan JPVS, Ahtien ngenukuka pekara tu seraya nambah, raban sida udah nyendiaka 50 botol (vial) vaksin rabies dikena nangkup tagit nyapai 500 iku ukui.

Program ti sama deka diatur ba Balai Mayuh Guna SUPP, Tupong kena 19 Januari tu berengkah ari pukul 9 pagi nyentuk pukul 2 lemai.