Bank Darah Sepital Sibu ngapil sukung mensia mayuh
Bank Darah Sepital Sibu minta sukung mensia mayuh datai meri darah dikena nampung suntuk bekal darah enggau nentuka bekal darah chukup maya kemisi Taun Baru China.
Penulung Pemesai Pemadah Bank Darah Sepital Sibu Lily Sinta madahka tu ulih dikemujur ari ngulu kimpin meri darah ti diatur ngelingi Sibu.
“Kami begunaka sukung mensia mayuh nentuka Bank Darah ngembuan bekal darah ti chukup dikena ngubat bala pesakit,” ku iya nerang lebuh dirandau nengah WhatsApp kemari.
Ba lansa bukai, Serakup Juruteknik Entukar Sibu udah ngatur kimpin meri darah ba premis serakup nya di Jalai Tapang Timur 1, Sungai Antu, kemari, berengkah ari pukul 9 pagi nyentuk pukul 12.30 ngalihari.
Sehari tu, Gerija City Harvest enggau Serakup Raban Bedaja Pasar Malam deka ngatur kimpin meri darah ba dua endur ti bebida di Sibu.
Kempen meri darah Gerija City Harvest diatur ba premis gereja di Jalai Merdeka ari pukul 9.30 pagi neyntuk 12.30 ngalihari.
Seraya Serakup Raban Beda- ja Pasar Malam deka ngatur kimpin meri darah ba Bank Darah Sepital Sibu ari pukul 9 pagi nyentuk 12 tengahari.
Ku Lily, sida ti deka mer darah mega tau datai ngelawa Bank Darah Sepital Sibu maya jam opis gawa.
“Hari Satu ngagai Hari Empat, jam gawa ba Bank Darah Sepital Sibu ari pukul 8 pag tengah 12.30 ngalihari enggau ari pukul 2 lemai nyentuk pukul 4.30 lemai.
“Seraya, Hari Lima ar pukul 8 pagi nyentuk 11.15 pagi enggau ari pukul 2.15 lemai nyentuk pukul 4.30 lemai,” ku iya nerang.
Lily madahka Bank Darah Sepital Sibu enda gawa kena Hari Enam, Hari Minggu enggau kemisi besai (bepanggai ba peminta mensia mayuh deka ngatur kimpin meri darah).
“Kitai ngapil ngagai mensia mayuh nyukung bala pesakit t begunaka darah. Jasa sida ti volunteer datai meri darah endang dikenang amat,” ku iya.
Penerang silik pasal pengawa meri darah, mensia mayuh tau telefon nuju Bank Darah Sepital Sibu ba lumur 084-238802 tauka 084-343333 sambung ngagai 2010.