Lebih 58,000 iku nerima pemaik bantu pengelantang 2018 ari JKM Sarawak
Opis Pengintu Pengelantang Mensia Mayuh (JKM) Sarawak ngagihka belanja penyampau RM209,590,550 juta ngagai 58,038 iku penerima bantu ninting bulan selampur Sarawak berengkah ari Januari nyentuk Disember 2018.
Menteri Muda Pengelantang Komuniti Datuk Francis Harden Hollis madahka penyampau nya ngaul bemacham bantu nyengkaum bantu orang tuai, nembiak mit, bantu bukai enggau elawin pekereja timpang pendiau.
Bantu bukai ku iya, nyengkaum bantu nyaga Raban Nyelai Pendiau (OKU) pesakit raya, bantu OKU enda ulih kereja, bantu anak diibun enggau bantu bala nembiak.
“JKM Bagi Menua Sibu udah ngagihka belanja sepenyampau RM30,141,450 ngagai 8,336 iku penerima bantu ninting bulan dalam timpuh ke sama,” ku iya nerang.
Iya mansutka jaku nya lebuh bejaku ba Program Sejambak Kasih Taun Baru China 2019 ba sebuah hotel tebilang ditu, kemari.
Sama datai Chairman Kaunsil Mengeri Besai Sibu (MPS) ti mega Kaban Kunsil Nengeri ( ADUN) Dudong Datuk Tiong Thai King, Sekretari Politik Kepala Menteri Daniel Bujal, Penghulu Chua Hiong Kee ngarika Dato Temenggong Vincent Lau Lee Ming, Pemesai Pelilih Sibu Suhaili Mohamed, Ketuai Pampang Pengelantang Rama JKM Sarawak Mohd Guntor Rajaee ngarika Pemangku Direktor JKM Sarawak, Pemesai JKM Sibu Emilda Piar Kunchui Uli, Temenggong Stanley Gramong Bandang sereta bala bukai.
Harden ti mega ADUN Simanggang madah, bantu di baruh JKM ulih ngelempungka tating belanja ditanggung rayat ti begunaka bantu.
Ku iya, sepenyampau 7,738 iku penerima deka nerima pemeri beserimbai enggau Taun Baru China ti disua maya atur Program Sejambak Kasih selampur nengeri tu.
“Sida deka nerima pemeri mata duit RM100 enggau hamper berega RM50 ti meri pengaga ngagai sida ngintu Gong Xi Fa Chai. Seraya sida ti enda ulih datai pemeri RM100 deka dipasuk ngagai akaun sida empu,” ku iya.
Iya madahka sepenyampau 2,073 iku tauka 26 peratus ari penyampau penerima bantu di Bagi Menua Sibu deka nerima pemeri tu nyerumba Taun Baru China.
“Ba program sehari tu, bisi 150 iku penerima bantu pengelantang ninting bulan deka nerima pemeri tu,” ku iya.
Batang tuju Program Sejambak Kasih tu ku iya dikena ngelempungka tating belanja enggau meri asai ati gaga ngagai sida nyerumba penatai hari besai.
“Kelimpah ari nya, dikena mantu ngangkatka tikas pemanah idup isi bilik ti seranta,” tambah iya.