Lumba, main aktiviti kokurikulum ti beguna ba sistem pelajar
Pemesai guna program lumba enggau main tu sebaka enggau aktiviti belajar dalam kelas ti deka meri empas ke positif
SIBU: Karnival lumba enggau main bela menggi tanggungpengawa beguna nyadi siti ari aktiviti kokurikulum, sebagi ari pengawa ngajar enggau belajar ba sekula.
Sapit Pemesai Pelajar Pelilih Sibu Sim Peck Huat madahka, pemesai guna program tu mega sebaka enggau pemesai guna aktiviti dalam kelas lalu tanggungpengawa tu gawa enggau ngenapka empas positif pengawa ngajar enggau belajar.
“Karnival Olahraga Pom Enam tu nyadi siti pengawa setipak enggau pelasar pemadu manah nempa bala nembiak ti regas batang tubuh enggau runding.
“Kaul bala nembiak ba lumba baka pekit belanda tu ulih nempa sida nyadi nembiak ti regas, angkunka atur.
“Tu deka nempa siku modal mensia ti ngembuan basa tinggi, bisi tanggungpengawa, disiplin enggau bisi penempa diri ti puh sereta bepenau nyadi ketuai.
“Pekara tu mih deka diterenakka kitai ngagai bala nembiak pom enam, ukai semina regas enggau pintar runding, tang mega regas sereta chakah ari sukut jasmani,” ku iya nerang ngarika Direktor Opis Pelajar Nengeri bejadika Karnival Olahraga Pom Enam Renggat Nengeri Sarawak 2019 di Stadium Tun Zaidi kemari.
Ba jaku dipansutka iya, Sim mega nyematak madahka pekit olahraga ukai semina nentuka sapa bagi champion enggau pemenang ba pekit aja.
“Pekara pemadu beguna iya nya pekit tu meri pelajar ngagai bala nembiak ke alai pemujur semina ulih dijalai nengah pengawa, pengepuh, nemu ngatur pengawa sereta ransing.
“Nengah latih ari sukut nyendika runding enggau semengat, atlit nya dilatih ngambika bisi ati deka besemekih enggau semengat tinggi.
“Ari tu, kitai ulih nempa modal mensia ti bisi kualiti enggau mensia ti ngembuan runding kelas satu ti nyadi pemesai menua dudi hari,” ku iya.
Ku Sim, lumba ti dikemeran ulih nagang bala nembiak ari ngereja aktiviti enda menuku.
“Aktiviti lumba mega ulih nerenakka penyerakup antara pupu bansa di Malaysia. Kitai patut beratka pekara penyer- akup dikena nempa sebuah menua Malaysia ti mujur enggau lantang.
“Siti ari chara pemadu manah iya nya nengah lumba baka pekit olahraga sehari tu. Semengat kerejasama enggau bebatak asur beguna amat ngemujurka aktiviti lumba.
Semua kaban lumba mesti begempung ngambika nyadi champion nadai ngira chura kulih, bansa enggau pengarap,” ku iya.
Karnival Olahraga Pom Enam Renggat Nengeri Sarawak 2019 diatur begulai Opis Pelajar Nengeri, Opis Pelajar Pelilih (PPD) Sibu enggau Sekula Sekondari (SMK) Sacred Heart udah digulu sepenyampau 147 iku atlit ari 15 buah sekula sekondari ari empat PPD iya nya PPD Sibu, PPD Kanowit PPD Meradong enggau PPD Betong.
Sekula sekondari ti ngamb bagi iya nya SMK Sacred Heart, SMK Meradong, SMK Datuk Patinggi Kedit, SMK Rosli Dhoby, SMK Bandar Sibu, SMK Kanowit, SMK Sibu Jaya, SMK Lanang SMK Sungai Merah, SMK Kampung Nangka, SMK Luar Bandar No. 1, SMK Durin, SMK Jalan Oya SMK Methodist enggau SMK Chung Hua.
Ba karnival olahraga sekal tu, lima pekit udah diatur iya nya pekit belanda 100 meter 800 meter, 4 x 100 meter lontar peluru enggau lompat jauh. Kesemua pekit tu diatur ungkup kategori lelaki enggau indu.
Sama datai Ketuai Unit Ngatur Pekara Mensia PPD Sibu Kong Chiong Hui enggau Chairman Pengatur Karniva Olahraga Pom 6 Tahun 2019 David Teo Wu ( Prinsipa SMK Scared Heart).
“
Tu deka nempa siku modal mensia ti ngembuan basa tinggi, bisi tanggungpengawa, disiplin enggau bisi penempa diri ti puh sereta bepenau nyadi
” ketuai.
Sim Peck Huat
Sapit Pemesai Pelajar Pelilih Sibu