PMS udah ngerikod mayuh pemujur kenyau ari 10 taun udah ditumbuh
Press Metal Sarawak Sdn. Bhd. (PMS) udah mayuh nyapai pemujur dalam 10 taun penumbuh kompeni nya di Sarawak.
Ketuai Kumpulan Pemesai Eksekutif Press Metal Datuk Paul Koon Poh Keong madah, dalam timpuh nya, Mukah mujur nyadi kandang menua ti nyadi pemansut aluminium.
“Ari nyadi pengimport aluminium, Mukah diatu udah nyadi kandang menua ti nyadi pemansut aluminium besai dalam timpuh 10 taun,” ku iya bejaku ba pengerami Makai Lemai Ninting Taun PMS di Kingwood Resort ditu kena malam Hari Lima tu tadi.
Ukai semina nya aja, PMS majak ngerikod pemujur laban ti udah datai ba tikas makit aluminium Eropah bedau lama ke udah.
Pemujur nya ku iya endang ngemegah laban nya ukai siti pekara ti nyamai enggau makit ti sigi ngemeratka kualiti sereta mayuh agi pekara bukai.
Tang, ari pengeransing enggau sukung ti kuat kelebih agi ari raban pengereja pengawa kompeni nya, semua ulih dijapai.
Paul mega ngaku madahka semua pemujur PMS diatu enda ulih dijapai enggau senang lalu udah mega napi mayuh penguji.
Berindik ari nya, iya ngela- lau semua staf PMS ngambika terus ngaga pemujur begulai enggau kompeni nyentukka jemah ila.
Iya mega madahka industri aluminium bisi peluang ti manah laban nya endang beguna dalam pengidup besehari hari.
“Kitai ulih meda guna aluminuim sereta bakani nya bekait dalam pengawa ti nyauka tetiap barang nyengkaum kereban rumah, begunan nyengkaum telefon binching enggau mayuh agi,” ku iya.
Sama bejaku ba pengerami iya nya direktor Besai PMS Choa Wei Keong.
Urung 1,000 iku pengereja pengawa PMS udah diintu beserimbai enggau pengeram makai lemai nya ti mega ngintu 10 taun penumbuh PMS.
Kelimpah ari makai lemai, bala ti bisi datai udah diperindang enggau pengawa betanda, belagu, ‘slideshow sereta nyabut tikit benasit.