Kena media rama enggau pekara ti betul, ku Ahmad
Gempung Pengajar Bumiputera Sarawak (KGBS) nangkan bala penguna media rama lebih agi ‘Facebook’ anang ngerembaika berita selebubu ngapa ke ulih ngasuh bala pengajar enggau apai indai nembiak enda lantang ati.
Presiden KGBS, Ahmad Malie madah KGBS berasai enda lantang ati bekaul enggau gambar-gambar ke bisi ayan ba media rama laban nya tau bendar ngasuh bala pengajar irau sereta ngasuh bala apai indai nembiak teguran runding.
“Kitai bela nemu, tanggungpengawa pengajar iya nya ngajar nembiak nyadi rayat ti siruka menua. Enda patut ketegal pengajar musil pending anak apai indai terus ringat sampai sanggup netak jari pengajar.
“Tambah mega menua tu, bisi undang-undang ke patut dititih dikena mutar asai enda puas ati ba sesiku orang.
“Nyema apai indai kempang ngereja ulah kasar baka nya tentu sida deka betapi enggau atur undang-undang,” ku iya.
Ahmad mansutka penemu nya nengah aplikasyen Whatsapp lebuh meri timbal bekaul enggau sebengkah gambar dalam lama media rama ti madahka lengan siku pengajar ditetap apai indai nembiak ketegal ringatka pending anak iya kena pulaska pengajar ba sekula, kemari.
Nya alai, ku Ahmad KGBS andal bala apai indai ba menua agi bebasaka undang-undang lalu enda ngaga undang-undang kediri empu.
“KGBS arapka mensia mayuh lebih agi penguna media rama enda ngerambaika berita-berita ke ulih ngasuh orang ringat dikena nentuka pengelantang enggau pengelikun menua lebih agi ngagai bala pengajar enggau piak apai indai nembiak.
“Nyema bisi pekara ke enda ngelantang ati apai indai ketegal ulah bala pengajar, minta kita apai indai ngaga ripot terus ngagai KGBS.
“Nengah ripot nya, KGBS deka bebendar mantu mutar isu tauka penanggul ke nyadi nya enggau lengkas.
KGBS enggai meda pemanah kaul entara pengajar enggau apai indai ke chukup manah diatu meranggang ketegal laya tauka besengki penemu sentang pekara ke baka tu, ku Ahmad.