Bantaika lis barang, rega hamper enggau terang, lalau Roslee

Bala pedagang ditangkan mantaika lis enggau rega barang dalam hamper ti dijual enggau terang ngambi ngemuntangka bala bebelika barang.

Ketuai Opis Menteri Dagang Dalam Menua enggau Pekara Bebeli Barang (KPDNHEP) Sibu, Roslee Maslie madah, naka diatu raban opis menteri nya apin nerima sebarang ripot ari sida ti bebelika barang sentang pekara nya.

“Tang kitai deka ngelalau bala pedagang ngambi mantaika lis sereta rega barang enggau terang ba tetiap hamper ti dijual,” ku iya.

Enti bala pedagang puntan ngaga baka nya, atur tau dipejalai di baruh Akta Kawalan Harga dan Anti Pencatutan 2011.

Roslee mega ngelalau sida ti bebelika barang pintar milih enggau mandingka rega sebedau sida meli hamper.

“Nyadi orang ti pintar runding mida rega dulu agi dikena nentuka kita bulih hamper enggau rega pemadu patut,” ku iya.

Iya mega ngelalau sida ti bebelika barang ngambi ngeripot ngagai KPDNHEP enti bisi pedagang enda mataika lis sereta rega barang ba hamper ti dijual.

“Kitai mega minta semua pedagang nitihka atur enggau meri kerejasama,” ku Roslee.

Datai ba pengawa ngintu Taun Baru China tauka musim hari besai bukai, tebal agi hamper dipilih nyadika pemeri ngagai bala bakih.

Nya kebuah bala pedagang beambi ulih nyual hamper ti ngundan bemacham bansa barang nitihka peneka sida ti bebelika barang.

Antara barang ti mayuh peminta iya nya barang pemakai, sarang burung, buah enggau ke bukai.