Perintah nengeri sigi bebendar ngurangka tating belanja rayat
pengawa nyaup ngurangka tating belanja ditapi rayat ke kurang bepenatai pemisi, perintah nengeri mantaika inisiatif baru iya nya nurunka tikas premium tanah penyampau 50 peratus berengkah 6 Mei 2018.
Pemutus nya dipansutka Kepala Menteri, Datuk Patinggi Abang Johari Tun Openg maya nemuai ngagai Kampung Maludam enggau Kampung Kuala Igan kena 6 Mei taun tu lalu pekara nyengala meri pengaga ati ngagai rayat ke disediaka lot- lot ba Skim Pengentap Baru enggau Skim Kampung Tangkir.
Atur nurunka tikas premium nya lebih agi ungkup Skim Pengentap Baru Stampin Fasa 1, Stampin Fasa 2, Stampin Fasa 3, Batu Kawa 2 ½ Fasa 1, Batu Kawa 4 ½ Fasa 2 Peringkat I, Batu Kawa 4 ½ Fasa 2 Peringkat II (Muslim), Batu Kawa 4 ½ Fasa 2 Renggat II (ukai Muslim), Batu Kawa 4 ½ Fasa 3 enggau Stapok ke mungkur penyampau 2,834 lot rumah.
Abang Johari beratika peminta nya dikena mantu rayat kurang penatai pemisi ke udah diberi lot-lot di Skim Pengentap Baru enggau Skim Kampung Tangkir mutar bayar premium ungkup lotlot nya.
“Ketegal polisi sinu ngagai raban kurang penatai pemisi lebih agi raban pengereja pengawa kunterik, orang bukai, orang berikan ba mengeri enggau menua pesisir, Kepala Menteri udah ngasuh tikas premium ditetapka ngagai RM2,500 siti lot iya nya nurun 50 peratus ari premium asal RM5,000 berengkah 6 Mei 2018.
“Atur nurunka 50 peratus premium tu mega deka meri pangka wang penyampau RM7.085 juta ngagai perintah nengeri,” ku iya.
Ungkup semua semilan Skim Pengentap Baru ke udah disebut, perintah nengeri mega udah setuju mayar baru premium ke udah dibayar ngelui RM2,500.
Peminta mayar baru premium meseti digaga abis laun 31 Oktober, 2018 lalu diperunding semina deka diberi ngagai pemengi lot asal aja.
Lot ke udah ditukar nama deka diperunding enda nyengkaum tukar nama enggau chara kasih diberi ngagai diri sebilik.
Peminta ulih digaga ba Opis Tanah enggau Survei (JTS) dikena mutar isu bayar premium ninting bulan pengelama 10 taun dalam 10 ansuran. PMPG NGETAN HAK RAYAT Isu ke udah lama nyadi petalat, Pemakai Menua Pulau Galau (PMPG) tepantup pengudah Aum Kunsil Nengeri (DUN) kena 12 Julai, 2018 ngemendarka Rang UndangUndang (RUU) Kanun Tanah (Pindaan) 2018 ngena Seksyen 6A(2) enggau Seksyen 6A(3)(b) diubah.
Sapit Kepala Menteri Datuk Amar Douglas Uggah Embas mantaika usul ngubah Seksyen 6A(2) dan Seksyen 6A(3)(b) ba bacha ti ketiga RUU Kanun Tanah (Pindaan) 2018 kena hari keempat Aum DUN Sarawak Penggal Ke18.
Kenu ku iya, hak nitih Seksyen 5 Kanun Tanah Negeri, temuda enggau ke bukai mengkang dipenggi tang madah diatu PMPG iya nya kampung puang ke dikeruga ketegal undang-undang tu.
“Perintah ngena jaku hak ‘usufructuary’ nyadi siti chara ke ditetap, meri chunto nyema siku orang nya deka minta sebuah tanah nyadi temuda, iya meseti udah bumai bekebun dia, udah nya PMPG meseti udah kala diperimba sebedau tu.
“Ngena undang- undang baru tu orang asal sigi enda lenyau tanah ngapa laban udah ditetap ba Seksyen 5 nyadi tanah Hak Adat Bumiputera (NCR),” ku iya.
Nengah ubah nya, perintah Sarawak deka ngaku adat PMPG ba bansa Iban, tang bansa bukai baka Melayu nyebut iya menua alai ‘ngiga pemakai’.
Uggah madah, iya deka berandau enggau Abang Johari bekaul pemintah sekeda kaban ti nimbal RUU nya minta sitak orang asal enda ditatak naka 500 hektar laban sekeda sitak ke dibungkur kelalu besai ngelui 500 hektar baka ba Ulu Rajang enggau Ulu Baram.
Ngelansa RUU nya, ku Uggah, entara isi iya nya hak ngagai tanah ulih digaga orang asal, garis menua enggau NCR nengah NCR Seksyen 2 Kanun Tanah, nyema hak ‘ usufructuary’ ke dipejalai ungkup peribumi sebedau 1 Januari, 1958.
Ku Menteri Betanam Betupi Moden, Tanah Adat enggau Pemansang Kandang Menua nya, jaku ‘ usufructuary’ semina deskriptif ari ubat enggau ulah ke dikemeran diaku undang-undang nengah ubah numbuhka hak ngempu penuh tanah nya.
“Tebal agi ulah ke diterang ba baruh hak-hak ‘usufructuary’ endang sebaka enggau PM enggau PG bansa bukai.
“Ulah - ulah tu diatu udah diaku nengah hak ‘usufructuary’,”ku iya.
Sitak hak- hak nya udah ditumbuh deka dikelala enggau ‘ domain menua orang asal ( peribumi)’ lalu surat pala tanah deka diberi ngagai barang sapa orang tauka piak ke menggi wasiat komuniti orang asal.
Surat pala tanah dikeluar ngagai ‘domain sitak orang asal ngempu menua lalu tanah ulih dikena ungkup tuju betanam betupi tauka pengawa bukai nengah pemendar ari Kaunsil Aum Perintah Nengeri (MMKN).
“Reti nya, tanah tu nyangka ukai semina dikena endur ngiga pemakai tauka ngasu beburu enggau ngiga kayuh ke guna diri, tang mega ungkup semua tuju betanam betupi nitihka Seksyen 2 Kanun Tanah.
“Laban tanah ungkup guna rasmi orang asal, nyadi komuniti nya ngembuan kuasa nentuka penyampau tauka pemesai tanah ke deka dikena diri,” ku iya.
Taja pia, nyema komuniti orang asal nya ngaga pemutus deka nguna bukai kelimpah ari betanam betupi, peminta meseti digaga ngagai MMKN endur nukar tuju nguna tanah.
Iya madah. Konsep ‘ domain sitak orang asal’ enggau pemansut surat hak pala tanah Bumiputera ulih dikena semua komuniti orang asal d Sarawak.
Nya alai, ku iya adat komuniti ke nadai dikena ungkup nerang sesebengkah sitak deka diaku nengah ‘domain sitak orang asal’ ke abru tu.
“Tambah mega, jaku baru ‘ domain sitak orang asal enggau ‘ hak usufructuary ngembuan kaul enggau PM enggau PG bansa Iban.
“Surat pala tanah orang asa tu mungkur reti ‘dokumen hak menggi’, enggau nya kuasa selama iya ba tanah ke udah diaku,” ku iya.
Nya alai, sebarang tanah ke dipenggi nengah hak-hak adat bansa asal deka ditumbuh nengah Seksyen 5 tauka ‘domain sitak orang asal’ d baruh perambu baru Seksyen 6A Kanun Tanah deka diiar ar sebarang Chukai Sementara ke dikeluarka nengah ubah Seksyen 28 Kanun Tanah.
Tambah mega, maya rang undang-undang nya dikemendar nengah Seksyen 213(1)(k) dikena nentuka peminta bekaul ‘domain ngagai sitak orang asal’ udah digaga nengah Seksyen 6A ke baru pengawa ngaku deka digaga ba Opis Daftar Tanah awak sitak nya ulih diaku nyadi ‘domain sitak orang asal’ ungkup surat pala tanah ke dikeluar awak tanah ulih sama dikena orang asal.
“Tu deka nentuka sitak nya enda ditinggal tauka dilak nadai orang ngempu diteju diberi surat pala tanah ngaga orang bukai,” ku iya.