Abang Johari ngemeratka sistem penyambung jalai kandang menua pesisir
peranak Sarawak kelebih agi ti ngena jalai tebing sungai enda didinga agi dalam timpuh berapa taun ti deka datai lebuh perintah Sarawak deka neruska empat projek ngaga jematan.
Ninting musim pulai pengerami hari besai, penguna jalai tebing sungai sebana nganti kelalu lama deka meraka sungai laban naka ke diatu agi ngena servis feri.
Taja pia, tiap peminta peranak di kandang menua pesisir seruran didinga Kepala Menteri Datuk Patinggi Abang Johari Tun Openg.
Pengawa ngaga Jematan Lassa (Daro), Jematan Rambungan ( Lundu), Jematan Bintulu- Jepak ( Kuala Kemena), Jematan Igan (Mukah), Jematan Batang Lupar (Samarahan/Betong) enggau Jematan Batang Paloh.
Berita manah tu udah dipadahka Kepala Menteri nengah pengawa mantaika Bajet Sarawak 2019 kena 5 November 2018. Semua projek tu diteruska perintah nengeri ba taun tu lalu ngena belanja kediri empu lebuh ti perintah besai nangguh projek pemansang tu.
Peranak menua pesisir deka nerima empas ari sukut sosioekonomi. Chunto nya, ngemuntangka sida mai asil betanam betupi ke mengeri, ngemuntangka pengawa mindah sereta mayuh agi.
Menteri Kereja Raya Baru Bian dalam siti ripot media kena Disember 2018 madahka, projek tu ditangguh ketegal belanja perintah besai ti enda chukup.
Taja pia, perintah Sarawak enggai malik ke belakang lalu semina nganti belanja ari perintah besai.
Endang deka diteruska, pia ku Abang Johari nyemetak madah nitihka ripot berita nya.
Berindik ari nya, Menteri Muda Jalai Tebing Pantai Datuk Julaihi Narawi kena 22 Disember 2018 madah munyi tu:
“Perintah Gabungan Parti Sarawk (GPS) endang mere- tika pemerat guna jematan tu dikena nentuka bisi jalai ti nyambung kandang menua tebing sungai.
“Peranak dikandang tebing sungai bisi hak nerima perengkaguna jalai alun ti manah ngambika kandang endur tu ulih ngemansangka semua pemisi ari sukut ekonomi lalu ulih ngangkatka tikas pengidup sida, sereta sistem penyambung ti manah agi.”
Kaban Kunsil Nengeri (ADUN) Daro Safiee Ahmad ngarika peranak di kandang menua nya endang ngelaluka pemutus perintah Sarawak bekaul projek ngaga jematan Batang Lassa ba pelilih Daro.
Dalam timpuh panjai ku iya, projek nya deka mai mayuh pemansang ke mega ulih ngangkatka tikas ekonomi kandang menua nya ti nyadika pengawa betanam betupi enggau berikan nyadi batang pengawa pemun sida.
“Perengkaguna pemun ti nyambungka kandang menua baka Tanjung Manis, Serdeng, Pulau Bruit, Matu, Daro enggau Mukah tu lalu ulih nentuka kandang menua tebing sungai nerima semua pemansang.
“Udah tentu ungkup peranak di kandang menua tu, nya deka nyadi perais ti endang berega,” ku iya madah nitihka siti ripot media ba bulan November 2018.
Semua rayat nemu projek Jalai Besai Pan Borneo Sarawak diatu benung chakah dipejalai. Berindik ari nya, sedarka peranak di kandang menua tebing sungai ti jauh ari Pan Borneo, perintah Sarawak mega udah ngenataika perambu ngaga Jalai Besai Kedua enggau jalai tebing tasik tauka sungai.
Udah tentu nyema tembu ila, nya deka nentuka peranak ba bebrapa kandang endur ke diatu bedau ulih dilawa deka disambung enggau jala ti manah.
Tu iya nya buah runding panjai Kepala Menteri dalam ngelangkar pemansang sosioekonomi peranak Sarawak.
“Sarawak deka neruska perambu projek ngaga Jalai Besa Kedua ti dijangka beungkus RM4 bilion nyentukka RM6 bilion,” ku Abang Johar nyemetak baka ti diripot media kena 23 Ogos 2018.
Jalai Besai Kedua nyangka deka berengkah digaga taun tu lalu diperambu tembu ba taun 2021 ti dibagi ngaga tiga pakej iya nya Pakej A (Kota Samarahan nyentuk ke Roban) urung 109 kilometer (km), Pakej B (Sebuyau nyentuk ke Sri Aman/Betong) urung 91 km sereta Pakej C (ngemanah Jalai Kelupu/Jala Tanjung Gentung ke Jematan Lanang, Sibu) pemanjai t dijangka dalam 31 km.