LRT Kuching-Kota Samarahan berita manah ungkup rayat
perintah negeri ngemajakka projek sistem Aliran Transit Ringan (LRT) ungkup jalai Kuching-Kota Samarahan nyadi berita manah ngagai peranak ke diau nguan dua pasar besai di Sarawak nya pengudah ngelama nganti pemutus ba pekara nya.
Tebal agi mensia mayuh nyambut manah pemutus Kepala Menteri, Datuk Patinggi Abang Johari Tun Openg pengudah 1 September 2018 iya madahka nangguh pengawa ngaga sistem Aliran Transit Ringan (LRT)laban deka meri jalai ngagai pemansang perengkaguna peranak menua pesisir.
Taja pia, berindik ari ansak raban kaunsilor enggau mensia, perintah negeri setuju neruska projek nya nengah jalai Kuching- Kota Samarahan ti nyadi keterubah be pengawa ngurangka penanggul penyekut jalai ke majak balat ba jalai nya.
“Jalai Kota SamarahanKuching meseti dikemeratka laban bisi sebana ti madahka jalai di Kota Samarahan-Kuching sekut ninting hari berengkah ari pukul 5 pagi kelebih agi maya jam orang nurun gawa.
“Aku nyamin perambu ngaga sistem LRT nya nitihka teknologi kereta api ke pemadu baru lalu jauh murah agi dibandingka enggau ke bisi di Malaysia,” ku iya lebuh bejaku nutup jurai ba Aum Kunsil Nengeri (DUN) Sarawak Ke18 kena 14 November 2018.
Ku iya, sebagi ari ungkus puku projek nya disebelaka enggau penguntung reta tanah ngelingi jalai nya ti diperambu begulai enggau pemansang bepelasarka transit.
Ku iya, penguntung diulih nengah nyediaka rumah ulih dibeli enggau pemansang pasar moden dalam kandang 800 meter ari endur ngetu transit tauka urung 10 minit bedarat.
Nitihka perambu tumu, perintah negeri deka berengkah ngaga tiga batang jalai LRT ba taun 2019 lalu dijangka berengkah beroperasyen sepenuh dalam taun 2024.
Abang Johari madah, asal iya ngembuan jalai pemanjai 154.2