Sarawak nyadi hab ekonomi digital global
Menteri Datuk Patinggi Abang Johari Tun Openg bejalaika inisiatif ekonomi digital dikena mai ekonomi Sarawak ngagai tikas maju agi enggau bepenatai pemisi tinggi datai ba taun 2030.
Pengawa ngatur keterubah Aum Besai Antarabansa Ninting Taun Ekonomi Digital (IDECS) kena 4 April, 2017 di Pusat Konvensyen Borneo Kuching (BCCK) udah ngerintai lapan resolusyen tauka atur pengawa nguing ngagai Ekonomi Digital Sarawak.
Antara resolusyen nya iya nya pengawa numbuhka Bank Pemansang Sarawak (DBOS), penumbuh Kaunsil Multimedia Sarawak (SMA), penumbuh Gempung Ekonomi Digital Sarawak (SDEC) sereta komitmen ngemanahka tikas peneras Internet, Kampung Digital dan E-Com Y30.
Dalam bulan November, 2017 Aum Kunsil Nengeri (DUN) ngemendarka Ordinan SMA lalu kena 13 Disember taun sama SMA dilanchar begulai enggau Strategi Ekonomi Digital Sarawak 2018-2022.
Kenu ku Abang Johari lebuh bejaku ba pengawa ngelanchar nya, SMA deka nyadi gempung besai ti deka matau enggau ngemataka strategi sereta inisiatif digital di nengeri tu.
“Bala kaban SMA datai ari Kepala Menteri nyadi chairman, tiga kaban kaunsil iya nya Sekretari Perintah Nengeri, Luyar Menua enggau Sekretari Pekara Wang Nengeri, enda kurang lima tauka enda lebih tujuh kaban bukai ti ngembuan peneleba, penemu tauka pemintar ti nyata ba komunikasyen enggau multimedia,” ku iya.
Ku Abang Johari, SMA ngembuan 16 pangku pengawa, antara iya, meri sanding penemu ngagai perintah pasal semua pekara bekaul enggau tuju polisi nengeri senentang aktiviti komunikasyen enggau multimedia dikena ngemansangka ekonomi digital mungkur pekara pemansang infrastruktur digital, pengelikun siber, pemansang penau, e-dagang, pansik enggau pemansang ba teknologi digital, inovasyen digital enggau pengawa dagang sereta perintah digital.
Ku iya nampung, Gempung Ekonomi Digital Sarawak (SDEC) nyadi raban gawa nyadi ejensi bejalaika SMA.
Abang Johari mega bechuntoka Estonia dikena ngukur ikas pemansang digital Sarawak berindik ari pemoden ngena teknologi pemadah ba menua mit Eropah nya.
Nitih ku iya, taja peranak Estonia bisi 1.3 juta iku, menua nya ketuai besai ba pemansang ekonomi digital.
“Rentayan arus penyambung tinggi rembus ngagai serap menua nya kunchi besai pemujur sida nyentuk ke diaku nyadi menua model digital.
“Enda chukup enggau rentayan arus penyambung ti rembus nya, Estonia nyendiaka peneras sambung Internet ti meruan.
“Nya alai, sepenyampau
“
Nya alai sepenyampau RM1bilion diungkupka perintah berengkah ari 2018 ti mungkur enam batang pemansang digital nyadi inisiatif agenda ekonomi
” digital Sarawak.
Datuk Patinggi Abang Johari Tun Openg
Kepala Menteri
RM1 bilion diagihka perintah nengeri berengkah ari 2018 ngaul enam domain pemansang digital nyadi inisiatif agenda ekonomi digital Sarawak,” ku iya lebuh mantaika belanja 2018 ba DUN kena 8 November tu tadi.
Agih belanja RM1 bilion nya ku iya, dikena ngaga mayuh agi infrastruktur telekomunikasyen nyengkaum nambahka penyampau legit pemanchar telekomunikasyen ngagai lebih 5,000 dibanding urung 1,200 diatu.
Ku iya, ngambika digital teulihka pemujur, Sarawak meseti ngingatka peneras servis rentayan arus penyambung ngagai 4TBps (terabit sesikin) dibida semina urung 1.3 TBps diatu.
‘BIG DATA’ Dikena nyapai juluk nempa Sarawak kuasa ekonomi digital ba rantau tu, ‘Big Data Sarawak’ versyen keterubah dilanchar deka nyadi reta strategi baru Sarawak kandang beberapa taun deka datai.
Lebuh mantaika Bajet 2019, ku Abang Johari, di baruh Strategi Ekonomi Digital Sarawak, perintah nengeri ngelanggur ngaga enggau nirika 600 legit telekomunikasyen selampur Sarawak datai ba taun 2020.
Ku iya, pengawa nirika 300 legit telekomunikasyen keterubah deka dipun laban tinda ti diberi ngagai Penyendia Servis (NFP) diketu kena 12 November tu tadi lalu endur legit tu dipilih belalauka peminta kritikal endur nya sereta pengulih gawa ngempung enggau nganjung ngagai legit bukai ba kandang menua pesisir.
“Renggat pengawa udah tu iya nya nambahka bungkur enggau rembus rentayan arus penyambung ba kandang menua pesisir.
“Ba tuju tu, 300 legit telko deka didiri dikena nyapai bungkur mindah kin kitu manggai 99.9 peratus sitak diuan peranak ba Sarawak,” ku iya.
Dikena nentuka raban nembiak chakah ngaul diri ba ekonomi digital, Hab Inovasi TEGAS- Tabung Ekonomi Gagasan Anak Bumiputera Sarawak (HIDT) dilanchar kena 28 Ogos, 2017 sebedau dikerembai ngagai Sarikei kena 17 September sebedau hab sama dibuka di Betong.
Perintah nengeri mega merambu numbuhka HIDT ba bagi menua bukai baka Bintulu, Miri, Limbang enggau Lawas nentuka nadai raban kelebih agi raban nembiak ti pintar teknologi pemadah dikelaung seriris enggau tuju penumbuh iya, iya nya nambahka kaul raban nembiak dalam bidang ekonomi digital.
Ba HIDT, bemacham perengkaguna disedia ungkup raban biak kelebih agi ba kandang menua pesisir ngansah penau sida ba bidang teknologi digital.
Ngambika empas besai agi enggau nentuka raban nembiak ti bepau ba pengawa nyual produk dikeluarka sida bepelasarka teknologi dig- ital, Kampung Digital deka berengkah dikemansang ba Taman Industri Teknologi Tinggi Samajaya.
Projek beungkus RM27 juta tu deka berengkah dalam bulan tu lalu dipelaba tembu bulan Mac 2020.
Kampung Digital pengudah tembu ila deka diangkat nyadi endur inklusif dikena ngulihka penau, nyukung pedagang enggau nempa pelangkar berinovasyen ngagai Sarawak.
Pengawa ngaga Kampung Digital dikena nyikap pengawa numbuhka Palan Penyulut Teknologi Sarawak (CENTEXS) ti nyadi palan pemansang pengelandik ngagai raban nembiak Sarawak kelebih agi dalam bidang digital.
Kelimpah ari nya, perintah nengeri deka meratka agi pengawa ba empat bidang iya nya Sains, Teknologi, Injinir enggau Matematik (STEM) berengkah ari kurikulum pelajar sekula primari enggau sekondari ba nengeri tu.
Abang Johari madahka tu antara pengawa perintah nengeri nempa modal mensia diguna ba jeman baru, jeman teknologi digital.
Berindik ari nya, kena 10 November 2017, CENTEXS nyain memorandum sempekat pemereti ati (MoU) enggau Huawei dikena nyendiaka awak ngagai raban nembiak ngulu latih enggau pemansang pengelandik dalam bidang digital.
Lebuh mantaika Belanja 2019, Abang Johari mega ngemandarka insentif RM1,000 ngagai genap iku anak mit Sarawak ti ada dalam taun 2019 lalu tu nyadi duit galau ti semina ulih dikeluarka pengempu iya maya manggai umur 18 taun.
Seraya inisiatif bukai ekonomi digital Abang Johari iya nya bejalaika sistem kelala digital ti dikumbai Sarawak ID dikena ngemudah pengawa rayat enggau perintah sereta mantu ngalih ke tikas kerajaan digital.
Digital Kenyalang dilanchar kena 14 November, 2017 menggi pangku pengawa nyadi pelasar mantu pedagang mikro nyual produk dikena nambahka penatai pemis sida.
Kena 15 November, 2017 Sarawak Pay dilanchar dikena meransang pengawa ngena aplikasyen bebayar nadai ngena mata duit.
Abang Johari mega ngemendarka RM5 juta ungkup ‘Venture Capital’ ngagai bala pedagang biak ba taun 2019 enggau RM18.4 juta ungkup Program Anjung Usahawan d Lawas, Sundar, Trusan enggau Gedong nyengkaum Samalaju SME Cluster.