SARES, SAWAS ngerembaika bungkur bekal kuasa karan, ai ke menua pesisir
udah ngagihka urung RM3.22 bilion dikena bejalaika tiga strategi besai ari baruh Pelin Besai Elekterik Menua Pesisir Sarawak dalam pengawa perintah Gabungan Parti Sarawak (GPS) ngenampakka rumah di genturung pendiau sereta rumah panjai di kandang menua pesisir ba selampur nengeri datai ba taun 2025.
Pelin Kepala Menteri Datuk Patinggi Abang Johari Tun Openg nya ngaul Skim Bekal Kuasa Karan Menua Pesisir ( RES), Skim Bekal Kuasa Menua Pesisir (RPSS) enggau Skim Bekal Kuasa Karan Alternatif Menua Pesisir (SARES).
Inisiatif tu mungkur sam- bung rentayan grid 33 kilovolt (KV) enggau ke baruh, sambung transmisyen grid 132 KV enggau ke atas sereta sambung rentayan bediri kediri SARES ke mega udah meri pemaik bekal elekterik 24 jam ngagai 97 peratus rumah di kandang menua pesisir.
Taja pan udah napi penguji ari sukut topografi sereta geografi tanah di Sarawak enggau tabur genturung pendiau ti ngachir di kandang menua bebukit sereta entigis sungai, tang pelin SARES dipeda ulih ngenampakka rumah rayat ke agi petang.
Tuju SARES tu iya nya ngurangka tating belanja peranak di kandang menua pesisir enggau menua ulu ti semina bepanggai ba kuasa injin api minyak diesel lalu bisi mega chara bukai ti ngena tekat mit tauka kuasa solar enti dibanding enggau terus ngena diesel ke mega patut ngira ungkus perengka pengangkut.
Skim RES ti dipejalai sebedau tu mega bisi ngembuan takak ti minta perintah ngerembaika pengawa nengah skim baru nya di 323 genturung pendiau ti ngaul 8,700 ruang bilik di kandang endur ke paling jauh di Sarawak.
Kelimpah ari nya Skim Bekal Kuasa Menua Pesisir (RPSS) ti ngaul kereja nirika rentayan pengawa nganjung ke menua pesisir enggau 20 grid ti baru di kandang menua ti jauh dikena nyediaka bekal elekterik ke sistem ngagihka kuasa RES.
Nengah ripot media, Menteri Bekal Ai enggau Elekterik Menua Pesisir Dato Dr Stephen Rundi Utom ti udah dikerandau ba Aum Kunsil Nengeri (DUN) November tu tadi madahka, selampur Sarawak deka ngasaika bekal elekterik datai ba taun 2025.
“Naka ke diatu, 91 peratus kandang menua tebing pantai di Sarawak udah nerima bekal elekterik lalu di mengeri udah 100 peratus.
“Nengah SARES, kitai ngarapka bungkur bekal kuasa karan iya nya pemayuh 91 peratus, nya alai kitai nagit penyampau tu deka nambah ngagai 100 peratus datai ba taun 2025,” ku iya. BEKAL AI BERESI Beserimbai enggau nya, perengkaguna bekal ai beresi mega nyadi pekara besai ti dikemerat perintah dalam ngemansangka Sarawak iya nya program SAWAS entara ti udah dipejalai dikena nentuka komuniti menua pesisir ti jauh nerima bekal ai beresi ti enda uih disambung nengah grid bekal ai ke endang udah bisi.
SAWAS ulih mekalka ai beresi nengah teknologi baru ngagai kandang menua pesisir Sarawak lalu projek tu endang beguna dikena nentuka juluk Sarawak nyapai 100 peratus nerima bekal ai beresi ba taun 2025.
SAWAS iya nya sistem bekal ai ti nemban ke ulih nyediaka ai beresi ngagai peranak di kandang menua pesisir ti enda ngembuan sambung ai paip.
Naka ke diatu, bungkur bekal ai di kandang menua pesisir iya nya 61 peratus lalu bisi pematut ti lengkas dikena nyedia sereta mekalka bekal ai ngagai 39 peratus peranak di kandang menua pesisir ti diarika 114,000 ruang bilik.
Perintah GPS mega mekuh ngagai pengawa mekalka kuasa elekterik enggau ai beresi ngagai sekula di kandang menua pesisir.
Ba tuju nya, Menteri Pelajar, Sains enggau Pansik Teknologi Dato Sri Micheal Manyin Jawong madahka, perintah Sarawak udah ngemendarka agih belanja urung RM50 juta dikena nyadiaka bekal kuasa elekterik ngagai 113 buah sekula primari di selampur nengeri tu.
Nangkan ke nya, ba pengawa mekalka ai beresi, perintah Sarawak deka nentuka sekula nerima ai beresi ti bisi entara sekula nya agi bepanggai ba ai ujan, ai bukit, telaga enggau sungai ti endang ditemu kualiti ai agi ba tikas ti baruh, ku iya madah ba aum DUN ba bulan November nyin kemari.
Kelimpah ari nya, perintah Sarawak komited ngerembaika bungkur bekal ai beresi nengah pengawa bejalaika projek nya ti diperambu berengkah taun tu.
Bedau lama ke udah, perintah Sarawak udah ngagihka urung RM2.8 bilion dikena mayar projek bekal ai beres di kandang menua ti suah nap penanggul bekal ai.
Projek tu deka dipejala dalam timpuh dua taun lalu dibagi nangai semilan pakej.
Seriris enggau juluk Abang Johari ti deka nyediaka beka ai beresi ti tan di selampur nengeri nengah sistem grid bekal ai, renggat keterubah program Grid Bekal A Sarawak ungkup kandang menua ti napi penanggul beka ai kritikal ngaul 251 projek ke diperambu tembu ba taun 2020.
Projek nya udah ngena ungkus sepenyampau RM3.92 bilion lalu diperambu RM2.8 bilion diagihka ari baruh Atur Pemansang Malaysia Lumpar Ke-11 (RMK11).
“Projek tu deka dipejala sereta diperambu tembu dalam timpuh dua taun enggau 249 projek deka tembu ba taun 2020 lalu dua bengkah projek agi deka tembu laum mimit.
“Naka ke diatu, lima projek udah tembu lalu 24 agi benung dipejalai sereta laluh projek ba mayuh renggat langkar lukis pelin enggau tinda,” ku Dr Rundi lebuh ti nyimpul jura jaku ungkup Opis Menter Bekal Ai enggau Elekterik Menua Pesisir ba aum DUN maya bulan November 2018.