Kandang menua selatan Sarawak manah nyadi palan dagang temuai

Kabndang menua selatan Sarawak iya nya ari Telok Melano nyentukka Sembilan Beradek nyengkaum Telaga Air udah dikelala nyadi sebagi ari palan dagang temuai di nengeri tu.

Beserimbai enggau nya, Menteri Muda Elekterik Menua Pesisir Datuk Dr. Abdul Rahman Junaidi madah perintah nengeri udah enggau komited ngemansangka insfrastruktur di kandang menua nya.

“Perintah nengeri udah ngaga palan tebing sungai, esplanade, nyeruri infrastruktur ke endang udah bisi nyengkaum ngaga infrastruktur baru ke nyadi sebagi ari pengawa dikena nyadika kandang menua nya palan dagang temuai ti ulih narit penatai temuai menua luar ke Sarawak.

“Semina nya bepanggai ngagai kitai kelebih agi peranak di kandang menua nya empu ngambika ngena perengkaguna ti udah bisi nya dikena ngangkatka penatai pemisi kelebih agi dalan industri dagang temuai,” ku iya.

Iya madah munyi nya lebuh ti bejadi Program Orang Dagang enggau Dagang Temuai ti udah disereta urung 500 iku mensia mayuh ti diatur Saberkas Pantai Damai enggau Unit Nembiak Srikandi Pantai Damai di Esplanade Telaga Air, ditu kemari.

Berindik ari nya, Dr. Abdul Rahman ke mega Kaban Kunsil Nengeri (ADUN) Pantai Damai ngarapka semua peranak di kandang menua Telaga Air ulih ngaul diri dalam industri dagang temuai.

Ku iya, tu berindik ari Telaga Air ngembuan mayuh palan ti narit temuai datai baka pengeraja asal, sungai, tasik, pulau enggau mayuh agi.

“TU nyadi peluang ungkup semua peranak ngambika ulih ngena nya nyadi pun penatai pemisi negah industri dagang temuai,” ku iya.

Program Orang Dagang enggau Dagang Temuai nya udah ngempung tiga elemen iya nya pekara dagang, betanam betupi enggau dagang temuai.

Mayuh aktiviti udah digaga baka pekit nyura ungkup nembiak, nyual pemakai enggau ai irup, pekit betanda sereta mayuh agi.