Titih chara diri empu gawa, ngemansangka Sarawak

Sarawak belajar ngatur politik ngena chara diri empu ngemansangka nengeri berengkah ari 1963 nyentuk Mei 2018

Utusan Borneo (Sarawak) - - Berita Iban -

BINTULU: Timpuh 55 taun pengudah Sarawak megai perintah kediri ngajar peranak Sarawak chara ngatur pengawa enggau ngemansangka nengeri nitihka langkar rampa politik enggau kuing dudi hari iya empu.

Kepala Menteri Datuk Patinggi Abang Johari Tun Openg madah, pengudah 55 taun megai perintah kediri, Sarawak belajar ngatur pekara politik lalu bekenaka chara ngemansangka nengeri berengkah ari taun 1963 nyentuk Mei 2018.

Ku iya, suba pekara nengeri tu diadu nengah kaul enggau Kuala Lumpur begulai enggau Parti Perikatan 1970, Barisan Nasional (BN) sereta patut belajar napi mayuh penekul ketegal baru megai perintah kediri, antara iya, keruga komunis, konfrontasyen enggau politik enda entu tegap.

“Lebuh nya, politik kitai agi kekapa tang kitai belajar. Taun nyin tadi, perintah besai betukar pengudah alah ba Pengawa Bepilih Besai Ke-14 (PRU14) tang kitai lantang ati Sarawak ulih ngetanka 19 ari 30 penuduk.

“Tu mega ngayanka kitai agi kering,” ku iya lebuh bejaku bejadika Aum Besai Tiga Taun Sekali (TGM) Parti Demokratik Progresif (PDP) ditu kemari.

Lebuh nya, politik kitai agi kekapa tang kitai belajar. Taun nyin tadi, perintah besai betukar pengudah alah ba Pengawa Bepilih Besai Ke-14 (PRU14) tang kitai lantang ati Sarawak ulih ngetanka 19 ari

30 penuduk.

Datuk Patinggi Abang Johari Tun Openg

Kepala Menteri Sarawak

Nya alai ku iya, beratika gaya pekara tu, kitai patut beratika pekara ti nyadi, mansik pengelemi ngatur pengawa enggau chara mutar ungkup Sarawak.

Ku iya, ba gempung BN ngaul konsensus patut sepenemu maya pemutus digaga majoriti lalu kitai patut nerima nyadi minoriti dataika meri pangka ngagai nengeri tu.

“Tok Nan ( ex- Kepala Menteri) madahka mayuh kuasa nengeri lenyau lalu minta dipulaika.

“Rambau Pengawa Bepilih Nengeri (PRN) 2016 rayat meri mandat pechayaka kitai nampung pengawa ngambi pulai hak enggau kuasa Sarawak,” ku iya.

Kenu ku iya, lebuh kitai megai nengeri tu, pemar besai ditapi nampung pengawa tu penguda dua taun pemidang Adenan, tang semengat gawa ngambi pulai kuasa ti lenyau meruan teguh.

Ku iya, taja manifesto nyadi semaya pengundi, tang semaya enda ulih ditukar lalu parti komponen nyadi tiang dudi hari Sarawak sereta patut belajar ari pengilap enggau nyaga nengeri tu enggau polisi betul ti meri pemaik ngagai rayat.

“Bekenaka teknologi enggau pemansut dikena mutarka pengelemi ti nyadi ba pemansang di menua ulu nengeri tu kelebih agi infrastruktur, nengah pengawa magi kandang menua ngagai tiga bagi iya nya Koridor Pemansang Wilayah ( RECODA) ngemansangka sitak Rajang, tanah tinggi enggau utara iya nya chara dipejalai dikena ngubah kandang menua pesisir,” ku iya nerang.

Iya madahka ari pejalai tu, belanja dikena lalu ditumbuhka bank pemansang iya nya Development Bank of Sarawak (DBOS) enggau belanja penyampau RM4.5 biliun mujur diulih dalam dua taun.

Pia mega ku iya, gaya pekara tu ngayanka Sarawak enda ibuh nganti Kuala Lumpur ngiga agih belanja pemansang tang ngemansang ngena belanja diri empu, nyengkaum netapka chukai petroleum lima peratus tauka RM3.89 biliun.

“Tu hak kitai nengah instrumen ekonomi ari nambahka rega pemansut. Ari pemereti ati rayat betubuh 2.8 juta ba nengeri tu ditegapka agi enggau penau, pemansut enggau semengat kitai ulih ngubah nyadi kuasa ekonomi berindik ari politik nentuka ekonomi nengeri tu,” ku iya.

Ditanya sentang timbal enggau penerima rayat ngagai Gabungan Parti Sarawak (GPS), Abang Johari ti mega chairman GPS madah, bepanggai ngagai rayat nentuka iya laban kitai bisi beberapa pro- gram, pengawa ditegi, pelasar kitai empu lalu pemutus kepenudi ba jari rayat.

Ngelansa pasal pengingin Pakatan Harapan (PH) nyilih pengawa megai Sarawak enggau strategi dipejalaika Sarawak, ku iya, “Tejuka sida berandau nengali”.

Sama datai Presiden PDP ti nyadi Kaban Parlimen (MP) Bintulu Datuk Seri Tiong King Sing, Menteri ba Opis Kepala Menteri ( Integriti enggau Ombudsman) ti nyadi ADUN Jepak Datuk Talib Zulpilip, Menteri Bekal Ai enggau Elekterik Menua Pesisir ti mega ADUN Kemena Dato Sri Dr Stephen Rundi Utom, Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit (KWKPK) Dato Sri Fatimah Abdullah ngarika Parti Pesaka Bumiputera Bersatu (PBB) sereta bala pengari ari Part Rakyat Sarawak (PRS), Presiden Parti Sa’ati Rayat Sarawak (SUPP) ti nyadi Menteri Pengawa Berumah enggau Kaunsi Kandang Menua Datuk Dr Sim Kui Hian.

Sapit Presiden PDP Datuk Nelson Balang Rining, Sekretar Besai PDP Datuk Anthony Nogeh Gumbek, Chairman Komiti Pengatur t mega Menteri Muda Kaunsi Kandang Menua Datu Dr Penguang Manggil sereta bala menteri kabinet nenger bukai.

NEGUHKA GEMPUNG: Abang Johari begulai enggau Tiong (rintai mua, tengah), bala menteri ngarika parti komponen PBB, PRS, SUPP sereta kaban kunsil Tetinggi PDP mantaika diri ransing ati di Bintulu ensanus.

NGELEMPUNGKA TATING BELANJA: Pengari Yayasan Sime Darby enggau RCKC, Louis Yong (dua kiba) begambar ungkup kenang begulai enggau bala penerima bantu sekula di SK Hulu Segan, Bintulu.

Newspapers in Malay

Newspapers from Malaysia

© PressReader. All rights reserved.