Talib: ‘ Website’ pelasar pemadu nemban ningkah petenah, ngemetulka penerang
Jaku petenah enggau jerita ngasuh saru penemu ti dituduh ngagai bala kaban kabinet perintah nengeri ti rurus gawaka rayat patut ditingkah nengah pelasar ti ulih mantaika pekara ke amat enggau terang pasal gaya pekara nyadi ngambika ditemu mensia mayuh.
Menteri ba Opis Kepala Menteri ( Integriti enggau Ombudsman) Datuk Talib Zulpilip madah, pekara tu dikena ngayanka pekara ke amat ngambika mensia mayuh nemu pasal servis ti udah dipejalai kelebih agi ngaul pemansang ba kandang menua nya.
Nya kebuah ku iya, beguna amat website ditumbuh ngambika pelasar nya ulih mantaika gaya pekara enggau penerang terang agi ba pekara nyadi enggau projek udah dipejalai.
“Tejuka mensia mayuh nemu pekara ke amat nyadi sentang mayuh pemansang dipejalai laban kitai seruran gawa mantu rayat,” ku iya lebuh bejaku bejadika Pengawa Ngelancharka Website dun67. net di Hotel Promenade Bintulu malam kemari.
Ku Talib, padah ngagai sida ti ‘enda ngetu kekutap’ ke alai kitai ransing gawa, taja enti bisi sebana ti amat dikenatai, kitai ulih nerima, tang anang bula.
Ku iya, penumbuh website tu awak pemadu manah endur nerangka program dipejalai ba sekeda menua lalu kitai ngarap bela ulih gawaka rayat laban tu tuju kitai ngaul diri ba politik.
Iya madahka diri bisi dikangau Universiti Kelantan enggau lima buah universiti bukai bekerejasama numbuhka siti forum bekaul enggau media literasyen dalam bulan Oktober taun nyin tadi.
“Ba penemu raban bepenau ukai semina ari Malaysia aja, pemisi telefon pintar tau nempa tauka ngeruntuh. Nya kebuah kitai patut setipak enggau ubah kemaya hari laban peneleba aku beratika bisi penau bekenaka teknologi tu nempa petenah enggau jerita bula sereta ngasuh kitai bejejimat,” ku Talib ti mega Kaban Kunsil Nengeri (ADUN) Jepak.
Balat agi ku iya, maya kitai bejaku baka tu, sida ngumbai pekara bukai dataika ulih ngerusak lalu kitai patut ngemetulka iya.
Berindik ari nya ku iya, kelimpah pengawa nempa website tu, raban ngatur website mega patut berani ningkah jerita bula sereta mantaika pekara ke amat dikena ngemetulka jaku petenah enggau pekara bula ari sekeda raban.
Talib mega belalauka diri empu ti bela kala dipetenah lalu berita bula lebuh ngepunka servis iya nyadi pengari rayat ba sitak nya ti begunaka siti pelasar mantu ngemetulka pekara enggau peragam negetif bala komuniti.
Ketuai Ngatur Pengawa ti mega Pengatur Unit Media Digital website dun67.net, Alhadi Mat madah, ba renggat tu pemisi website sitak Bepilih Kunsil Nengeri (DUN) N67 Jepak nya semina langgur penemu bukai ti dibantai.
Taja pia ku iya, pemisi website tu diperati ulih ngemai pemaik ngagai peranak ba sitak DUN Jepak.
“Dikena mutarka petenah ba laman rama, nadai website baka tu, pengawa ti manah deka dilamun enggau petenah lalu tu mega deka ngemuntangka peranak mantaika sebana sida, enda ibuh ngelawa opis palan servis DUN Jepak, nyengkaum matak pom bekaul tauka nganjung email,” ku iya.
Ku iya, pemisi laman rama ti enda ulih ditagang enggau nyaru dikena mejah orang bukai, nya kebuah pemisi website baka tu deka ngemetulka pekara ti nyadi kelebih agi ba sitak DUN Jepak ngambika rayat nerima pemaik ari nya sereta semua penerang ulih dikunsi enggau bala bukai.
Sama datai Sapit Residen Bintulu Hussaini Hakim Sapit Menijar Besai Kaunsi Pemansang Bintulu (BDA) Abdullah Mohd Sheriff, Chairman Balai Dagang Bumiputera Sarawak ( DUBS) Bintulu Abdul Kadier Sahib, Sekretar Pampang Parti Pesaka Bumiputera Bersatu (PBB) Jepak Shamsuddin Abd Razak Pemesai Opis Pengarap Islam Sarawak Bintulu Azhar Hipni Temenggung Rosli Kamaruddin, bala kaban PBB Jepak bala ketuai raban bansa, ketua opis sereta bala bukai.