Kaul manah pengajar, apai indai nentuka pemujur pelajar nembiak
Pengajar ti ngaga kaul ti manah enggau apai indai iya nya entara pengajar ti ulih nyapai pemujur dalam pengawa sida nyeridi bala nembiak sekula, ku Presiden Gempung Pengajar Sarawak (STU) Macky Joseph.
Ku iya madah, kaul ti manah enggau bala apai indai ulih nentuka pemaik ti nyungkak pemujur nembiak di sekula.
Iya bejaku munyi tu nyukung penerang Menteri Pelajar, Sains enggau Pansik Teknologi (MESTR) Dato Sri Micheal Manyin ti merambu minta Opis Menteri Pelajar patut meransang pengajar minta numbur telefon apai indai nembiak ngambika ulih ngaga komunikasyen ti manah enggau sida.
Nitih ku penerang ari Manyin, tu ulih ngadaka kaul ti efektif enggau apai indai kelebih agi bekaul penanggul ti ditapi nembiak, lalu iya mega minta Opis Pelajar Sarawak mansutka pekara tu ti patut ditangkan ngagai semua sekula, ke minta tetiap pengajar meseti nyimpan numbur telefon apai indai nembiak ngambika pengajar enggau apai indai ulih berandau manah pasal penanggul bala anak sida di sekula.
Ku menteri nya, lebuh penemuai rasmi sida ke Finland kena bulan Mei taun nyin tadi, sida udah dipadah tetiap pengajar di menua nya bisi nyimpan numbur telefon apai indai nembiak lalu nya ti ngadaka komunikasyen ke manah entara kededua raban tu laban sida ulih berandau sebarang maya bekaul aktiviti nembiak di sekula.
“Tanggungpengawa pengajar iya nya ngiri penemu ngagai nembiak lalu apai indai iya nya raban ti endang meseti bisi dalam pengawa nya. Nya alai, pengajar ti ngadaka kaul ti manah enggau apai indai entara orang ti nempa pemujur dalam pengawa sida nyeridi nembiak sekula.
“Lebuh pengajar enggau apai indai gawa begulai, pia mega nembiak sekula deka nerima mesej ti konsisten bekaul reti ti berega dalam pelajar, lalu sida mega ngasaika diri bisi disukung sereta diperansang semanjai sida nguihka penemu,” ku Macky madah.
Ku iya nerang, kebendar pengajar di menua kitai endang udah lama ngadaka kaul ti bansa nya elebih agi pengajar kelas.
“Sida meseti ngisi ‘Jadual Kedatangan Pelajar’ iya nya bup ti dikena ngerikod penatai nembiak ninting hari. Rikod bekaul nembiak sekula enggau apai indai disimpan dalam bup nya. Berindik ari nya, bisi penerang ti dikena pengajar nyema sida deka ngiga apai indai nembiak bekaul pekara enti nembiak enda datai ke sekula tauka pekara bukai baka ngemaruka penerang bekaul nembiak nengah chara ‘on-line’.
“Diatu, pengajar kelas bisi ti ngena applikasyen ‘Whatsapp’ tauka ‘Telegram’ tauka aplikasyen bukai dikena ngaul apai indai ti dipeda ngemuntangka kededua raban, pengajar enggau apai indai lebuh ti meri penerang bekaul pekara akademik nembiak, pia mega ulah bala anak sida ari sukut moral, sekalika dalam pelajar tauka ba penanggul rama,” ku iya nyemetak.
Iya mega madahka kaul ti manah bansa tu ulih ngenataika pemaik baka meri peransang tauka ngembing sida ngambika enda tepawah ari jalai ke patut.
Ku Macky nambah, pengajar mega meseti begulai enggau raban pengatur sekula, kepala pengajar, pengajar kanan sekalika ungkup sekula pagi tauka sekula lemai lebuh sida ti ngaul apai indai ngambika semua pekara nya ditemu enggau terang lebuh ti sida madah sekeda pekara ngagai apai indai.
Berindik ari nya, STU meri puji ngagai apai indai ke ngiga penerang bekaul bakani anak sida tauka nembiak sekula ngulihka penemu, lalu pia mega pengajar begunaka timbal ari apai indai bekaul pemansang anak sida dalam pelajar. Kededua raban tu patut ngadaka kaul ti positif enggau sekua.