Pengeransing niang Tok Nan ngetanka hak Sarawak tetap diteruska

Utusan Borneo (Sarawak) - - Berita Iban -

Pengeransing pengawa Niang Datuk Patinggi Adenan Satem tauka dikelala agi enggau nama Tok Nan seruran diteruska tajapan sepengudah dua taun pemidang iya.

Ketuai Orang Indu Parti Pesaka Bumiputera Bersatu (PBB) Dato’ Sri Fatimah Abdullah madah, pengawa ngetanka hak nengeri tu ti udah ditulis dalam Sempekat Malaysia 1963 (MA63) kebendar nya dipunka niang lalu tetap deka diteruska.

“Tok Nan udah ngerak kitai ari tinduk lalu nyedarka kitai bekaul hak ti bisi majak enda dikibuh,” ku iya dalam ‘Jerayawara Gabungan Parti Sarawak (GPS)’ di Dataran Udang Mukah pagi kemari.

Sama bisi datai iya nya Ketuai Nembiak PBB Gerald Rentap Jabu enggau Kaban Kunsil Nengeri ( ADUN) Tellian Yussibnosh Balo.

Nitih ku Fatimah, taja Tok Nan enda sempat nembuka pengawa ti dipunka iya tu sereta minta pulai hak ti udah dalam MA63, tang nya tetap deka diteruska nyentukka diatu nengah penumbuh GPS.

Kepala Menteri Datuk Patinggi Abang Johari diatu ku iya udah nganti niang nyadi ketuai ti neruska pengawa tu.

“Penumbuh GPS endang ngena diatu dikena nitai nentuka semua peminta enggau hak nengeri tu ulih dijapai,” ku iya nambah.

Berindik ari nya, kredibiliti GPS enda ulih disangkal agi enggau peneleba 50 taun lebih ngatur sereta megai perintah di nengeri tu.

PIa mega, ku iya nambah, GPS diatu nadai dikeruga runding ari parti luar lalu semua parti komponen dalam nya diatu iya nya parti ti bepelasarka Sarawak.

Taja pan gaya politik Malaysia udah berubah kenyau ari Pengawa Bepilih Besai bedau lama, iya nya perintah besai udah betukar ngagai pegai perintah Pakatan Harapan (PH), tang kebendar perintah Sarawak agi mengkang lalu nyentukka diatu agi ari baruh pegai perintah GPS.

Fatimah mega udah meri tanggungpengawa ngagai semua kaban parti komponen GPS nyengkaum kaban lama ngambika mantu ngelakuka gempung nya ke tetiap renggat enggau serak komuniti.

Tim konvoi nya berengkah kena 11 Januari tu tadi ari Limbang lalu sepengudah nya deka bejalai ngagai selampur nengeri sereta diperambu tembu di Kuching.

FATIMAH

Newspapers in Malay

Newspapers from Malaysia

© PressReader. All rights reserved.