Patut bisi langgur atur meruan nyeliah penanggul dudi hari
Atur natak jam komunikasyen semina siang hari aja antara apai indai enggau pengajar ngambika enda ngachau kededua raban
SIBU: Atur lalau patut dilanggur enti peminta Dato Sri Michael Manyin ngagai Opis Pelajar Sarawak meransang bala pengajar minta lumur telefon apai indai nembiak dikena ngemuntangka komunikasyen sida, dipejalaika.
Ku Presiden Gerempung Pengajar Bumiputera Sarawak (KGBS) Ahmad Malie, ambika chunto, atur lalau ti dilanggur nyangka tau natak jam komunikasyen (antara kededua raban) ngagai siang hari, berengkah ari pukul 7 pagi nyentuk pukul 5 lemai.
“Pengudah pukul 5 lemai, patut nadai agi randau.
“
Pekara baka tu tentu mega deka meri penanggul ila. Nya kebuah ari pun, pejalai
” mesti datai enggau lalau tauka atur.
Ahmad Malie
Presiden KGBS
Enti nadai atur baka tu, bisi pekara deka nyadi, nyangka tau ngachau kededua raban kelebih agi malam hari enti nadai ditagang.
“Pekara baka tu tentu mega deka meri penanggul ila. Nya kebuah ari pun, pejalai mesti datai enggau lalau tauka atur,” ku iya madah ngagai The Bor- neo Post kemari.
Ngingatka pangka positif, iya madahka pengawa baka tu manah antara pengajar enggau apai indai matau disiplin anak sida sereta mega penyapai akademik sida, seraya nambah, langgur penemu tu deka diperati silik agi.
Ahmad ngelansa pasal Menteri Pelajar, Sains enggau Pansik Teknologi (MESTR) ke alai Opis Pelajar Sarawak patut meransang bala pengajar minta lumur telefon apai indai nembiak ngambi ngemuntangka agi komunikasyen.
Ku Manyin, tu deka ngasuh bala pengajar berandau enggau apai indai meruan agi maya penanggul nyaul bala nembiak nyadi lalu merambu Opis Pelajar ba Sarawak ngeluarka pekeliling ngagai semua sekula, ngerah genap iku pengajar mesti nemu lumur telefon apai indai nembiak ngambika bala pengajar enggau apai indai ulih berandau meruan agi maya bisi penanggul bala anak sida ba sekula.
Manyin mega bisi nyebut rambau pejalai gawa iya ngagai menua Findland dalam bulan Mei taun nyin tadi, sida dipadah tetiap pengajar bisi lumur telefon apai indai nembiak lalu bala pengajar enggau apai indai din ulih berandau sebarang maya pasal penyulut nembiak sida.
Ba pekara tu ku Ahmad, KGBS endang nerima enggau nyukung peminta Dato Sri Michael Manyin sentang kaul antara pengajar enggau apai indai diteritka agi nengah telefon binching.
“Ba KGBS, tu pengawa ti manah antara apai indai enggau pengajar, dikena matau disiplin bala anak sida sereta mega penyapai akademik sida.”
Iya beratika pekara ke amat, pengawa ngeneguhka kaul antara pengajar enggau apai indai nengah telefon binching udah dikemeran ba menua ti udah nyulut agi ba pekara pelajar lalu antara menua tu iya nya Finland, Estonia, Japan enggau sekeda menua bukai.
“Berindik ari pekara tu ulih mantu ngenegapka agi disiplin enggau penyulut akademik bala nembiak, KGBS bepenemu nadai salah enti kitai nunda model tu ditipak enggau peminta menua kitai,” ku Ahmad.